Tre ditë pasi mori zyrtarisht detyrën e ministrit të Brendshëm, Bledi Çuçi, ka shkuar për një vizitë në familjen e Klodian Rashës, 25-vjeçarit që u ekzekutua nga një efektiv i repartit Shqiponja, mëngjesin e 8 dhjetorit.
Ngjarja e rëndë u pasua nga protestat e të rinjve, që çuan në dorëheqjen apo shkarkimin e Sandër Lleshajt si ministër.
Vizita e Çuçit në familjen Rasha zgjati rreth 10 minuta, ndërsa ai shoqërohej nga drejtori i SHÇBA, Muhamet Rumbullaku dhe zyrtarë të tjerë të lartë të Policisë së Shtetit.
Çuçi shprehu mirënjohje për qëndrimin dinjitoz të familjes gjatë gjithë këtyre ditëve e në veçanti përgjatë ditëve të protestave.
Efektivi i policisë Nevaldo Hajdaraj, autori i vrasjes, është arrestuar, por ende nuk është zbardhur detaji se kujt i përkiste arma, e cila u gjet disa metra larg trupit të viktimës, dhe për të cilën u pretendua në fillim nga policia, se 25-vjeçari ishte i armatosur.
