Vizita 4 ditore e kryebashkiakut të New York-ut, Eric Adam në Shqipëri, ku këtë të mërkurë u takua me Edi Ramën në Kryeministri, është shoqëruar me një valë kritikash nga zyrtarët e huaj, sipas raportimit të “Daily News”.
Kjo pasi vizita e Adams përkonte në një ditë me ceremoninë përkujtimore të Departamentit të Zjarrfikësve të Qytetit të New Yorkut. Daily News shkruan se kjo ishte hera e parë që Adams mungonte në ceremoni që nga viti 2022 kur mori detyrën dhe mungesa e tij nuk është pritur mirë nga përfaqësuesit e Unionit të Zjarrfikësve.
‘Anëtarët tanë rrezikojnë jetën çdo ditë për të mbrojtur këtë qytet. Të shohësh kryebashkiakun jashtë vendit ndërsa FDNY mblidhet për të kujtuar të rënët tanë është vërtet lënduese,’ është shprehur Presidenti i Unionit të Zjarrfikësve.
Media e huaj shkruan gjithashtu se kjo vizitë e papritur e Adams në Shqipëri ka ngjallur interes për arsyet dhe qëllimet e saj, nisur edhe nga fakti se Qeveria shqiptare do të mbulojë dhe një pjesë të shpenzimeve të tij.
Ky është një rast i përsëritur, pasi Adams është akuzuar më parë nga prokurorët federalë për pranimin e më shumë se 100,000 dollarëve ryshfet nga qeveria e Turqisë, kryesisht në formën e udhëtimeve luksoze dhe argëtimit turistik falas ose me zbritje.
Artikulli i plotë i Daily News
Në mes të një udhëtimi zyrtar në Shqipëri ku po viziton Edi Ramën, kryebashkiaku i New York, Eric Adams, po mungon në ceremoninë përkujtimore të këtij viti të Departamentit të Zjarrfikësve të Qytetit të Nju Jorkut (FDNY), që nderon anëtarët e rënë të shërbimit, duke shënuar kështu herën e parë që ai mungon në këtë ngjarje që nga marrja e detyrës në vitin 2022.
Presidenti i Unionit të Zjarrfikësve të Bashkuar të New York, Andrew Ansbro, i cili përfaqëson rreth 9000 anëtarë aktivë të FDNY, e quajti vendimin e Adams-it ‘jashtëzakonisht zhgënjyes’ dhe ‘herën e parë në kujtesë që një kryebashkiak në detyrë mungon në këtë ngjarje të rëndësishme.’
‘Anëtarët tanë rrezikojnë jetën çdo ditë për të mbrojtur këtë qytet. Të shohësh kryebashkiakun jashtë vendit ndërsa FDNY mblidhet për të kujtuar të rënët tanë është vërtet lënduese,’ tha Ansbro të martën.
‘Ne presim që udhëheqja e qytetit të qëndrojë pranë nesh, jo vetëm kur është e përshtatshme, por kur ka vërtet rëndësi.’
Ceremonia e mëngjesit të së mërkurës në Katedralen e Shën Gjonit Hyjnor në Morningside Heights do të nderojë tetë zjarrfikës dhe punonjës të emergjencës që kanë ndërruar jetë gjatë vitit të kaluar, përfshirë kapitenin e FDNY, Thomas LaBarbiera, i cili vdiq në moshën 51-vjeçare nga kanceri i lidhur me 11 Shtatorin, në shtator të vitit të kaluar.
Adams, i cili javën e kaluar hoqi dorë nga gara për rizgjedhje, pritej të merrte pjesë dhe të mbante fjalën kryesore. Një njoftim i brendshëm i FDNY, i shpërndarë të enjten e kaluar, tregonte se kryebashkiaku ishte planifikuar të vendoste një kurorë dhe të fliste në ceremoni.
Por zëdhënësi i tij, Zachary Nosanchuk, konfirmoi të martën se Adams nuk do të jetë i pranishëm, pasi ndodhet në Shqipëri deri të enjten, ku po zhvillon takime me kryeministrin dhe drejtues të tjerë vendas. Në vend të tij, në ceremoni do të marrë pjesë zëvendëskryebashkiaku për sigurinë publike, Kaz Daughtry.
‘Me mbi dy dekada përvojë në fushën e rendit publik, kryebashkiaku Adams vlerëson thellësisht burrat dhe gratë trime që rrezikojnë jetën për të mbajtur New Yorkun të sigurt,’ tha Nosanchuk, duke theksuar se administrata e Adams ka shpenzuar së fundmi 91 milionë dollarë për zëvendësimin e ambulancave të FDNY.
Ndërkohë, zëdhënësja e shtypit e Adams, Kayla Mamelak, kundërshtoi pretendimet se është e pazakontë që një kryebashkiak i New Yorkut të mungojë në këtë ceremoni vjetore, por nuk specifikoi cili nga paraardhësit e tij kishte bërë të njëjtën gjë.
Adams kishte marrë pjesë në ceremonitë përkujtimore të FDNY në vitet 2022, 2023 dhe 2024. Në fjalimin e tij në ceremoninë e vitit të kaluar, ai e kishte cilësuar këtë ngjarje si veçanërisht të rëndësishme për të, si ish-kapiten i policisë së Nju Jorkut (NYPD).
‘Kur mblidhemi për të reflektuar mbi vitin, për të qenë këtu me kolegët tanë dhe për të treguar se ‘mos harro kurrë’ nuk është thjesht një slogan, por një akt nderimi për ata që kemi humbur,’ kishte thënë ai në atë ceremoni.
Sipas Mamelak, udhëtimi i kryebashkiakut në Shqipëri po mbulohet pjesërisht nga Bashkia e New Yorkut (fluturimet dhe disa shpenzime), ndërsa qeveria shqiptare po paguan akomodimin dhe transportin tokësor, rreth 290 dollarë në ditë.
Ky detaj ka ngritur disa pikëpyetje, duke pasur parasysh se ish-aktakuza federale e Adams, tashmë e hedhur poshtë, e akuzonte atë për marrje ryshfeti nga përfaqësues të qeverisë turke.
Adams u nis për në Shqipëri të hënën e kaluar, vetëm një javë pasi tërhoqi kandidaturën e tij për rizgjedhje mes sondazheve të ulëta dhe polemikave që pasuan mbylljen e çështjes gjyqësore ndaj tij.
