Nga Boldnews.al
Në natën e nxehtë të 21 korrikut 2016, Parlamenti votoi me 140 vota pro ndryshimet kushtetuese që i hapnin rrugë reformës në drejtësi. Katër vjet më pas, reforma ka përfundur buzë ujërave të ndotur të Lumit Lanë, ndërsa fatkeqësisht edhe ndërkombëtarët bërtasin për pastërtinë e saj. Mban ca erë të rëndë ky produkt, e po ashtu ca pisllëqe të hedhura nga mazhoranca, por shqiptarët duhet të pinë pikërisht këtë ujë të ndotur të paketuar në ambalazhin e qeverisë dhe përfaqësive diplomatike në Tiranë.
Edhe sot u vërtetua kjo në Parlamentin e Shqipërisë, ku me 96 vota pro u zgjodh anëtari më i ri i Gjykatës Kushtetuese Altin Binaj. Ishte emri i vetëm i nisur nga Këshilli i Emërimeve në Drejtësi, ndonëse kushtetuta e përcakton se duhet të jenë jo më pak se tre kandidatë dhe kuvendi do të përzgjedhë njërin prej tyre. Sa i rëndësishëm ishte ky votim e thotë vetë puna. Kush ishte i pari që lajmëroi këtë “arritje”?
“Parlamenti shqiptar ka votuar sot anëtarin e fundit të Gjykatës Kushtetuese me 96 vota, të mjaftueshme për ta zgjedhur atë anëtarin e ri të Gjykatës Kushtetuese shqiptare. Kjo është një detyrë shtëpie e rëndësishme për ndërtimin e institucioneve të reja të drejtësisë”, shkruan në anglisht kreu i grupit parlamentar të PS-së Taulant Balla.
Me siguri ambasadorja amerikane Yuri Kim e ka lexuar postimin e Ballës pa pasur nevojë për përkthim, sepse numri një i diplomacisë amerikane në Tiranë vendosi “ultimatum” se brenda datës 31 dhjetor Gjykata Kushtetuese duhet të jetë funksionale. Tashmë pritet edhe një tjetër anëtar që do e zgjedhë kreu i shtetit Ilir Meta, por nuk është përcaktuar se sa emra do i shkojnë për përzgjedhje presidentit të republikës.
Minimalisht u shkel kushtetuta, ku në nenin 125 përcaktohet se kuvendi ose parlamenti zgjedhin një nga tre emrat që paraqiten si kandidatura nga KED për anëtar në Gjykatën Kushtetuese. Sot fituesi ishte i paracktuar sepse kandidonte i vetëm edhe nëse Parlamenti nuk do ta aprovonte, ai automatikisht pas 30 ditësh konsiderohej anëtar i ri i Gjykatës Kushtetuese. Mirëpo pikërisht njeriu që duhet të shqyrtojë paligjshmëritë dhe shkeljet kushtetuese në vend, emërohet në kundërshtim me kushtetutën.
Është institucioni më i rëndësishëm i drejtësisë, por u kthyer në më qesharakun. Për tu bërë anëtar i Gjykatës Kushtetuese mjafton edhe të kryesh një akt notarial prej 36 mijë lekësh të vjetra dhe më pas të shpresoh të veshësh mantelin e gjyqtarit të kushtetueses. Këtë bëri Arta Vorpsi, e përzgjedhura nga mazhoranca, e cila pasi e kuptoi se kushtetuta ishte shkelur me të dyja këmbët, e çoi marrëzinë deri në pafundësi. Shkoi pranë një notereje që ndodhet buzë Lanës dhe nëshkroi atë akt dhe u “betua” para noteres dhe jo presidentit.
Nëse edhe kreu i shtetit brenda këtij viti përzgjedh anëtarin tjetër të Gjykatës Kushtetuese, atëherë ky institucion bëhet funksional dhe do të marrë në shqyrtim çështje të rëndësishme siç është ligjshmëria ose jo e zgjedhjeve lokale (votimeve) të 30 qershorit të vitit të kaluar. Do merren në shqyrtim edhe ndryshimet kushtetuese dhe të Kodit Zgjedhor në tetorit të këtij viti, ku mazhoranca duke përdorur të vetëshpallurit deputetë opozitarë hoqi të drejtën e kualicioneve parazgjedhore.
Çështje të rëndësishme, por do të jenë në duart e anëtarëve të përzgjedhur me izmin e partisë dhe me shtysën e ndërkobëtarëve, që më shumë se për cilësi dhe zbatim ligji, kanë nevojë për shpërndarje të hirit propagandistik mbi të ashtëquajturën drejtësi e re, e cila përfundoi në duart e politikës së vjetër në pushtet, që për shtatë vjet ka rrëbyer çdo institucion të pavarur.
