Njëzetepesë qytetarë janë arrestuar dhe 130 të tjerë janë proceduar penalisht në gjendje të lirë, lidhur me protestën e djeshme në Tiranë.
Policia njoftoi se ata akuzohen për veprat penale: “Organizimi dhe pjesëmarrja ne grumbullime e manifestime të paligjshme”, “Kundërshtimi i punonjësit të policisë së rendit publik”, “Pengimi i qarkullimit të mjeteve të transportit”, “Prishja e qetësisë publike”, “Shkatërrimi i pronës me zjarr” dhe ”Mosbindja ndaj urdhrit të punonjësit të policisë së rendit publik” dhe ‘’Mbajtja dhe përdorimi i lëndëve plasëse dhe piroteknike’’.
Të njëjtat burime shtuan se, “vijon puna për identifikimin dhe kapjen e personave të tjerë të përfshirë në veprime të dhunshme ndaj Policisë, pronës shtetërore dhe asaj private, si dhe për identifikimin dhe kapjen e organizatorëve të cilët kanë bërë dhe bëjnë thirrje në rrjetet sociale për të marrë pjesë në tubime të paligjshme”.
Gjatë kësaj jave janë zhvilluar protesta në Tiranë dhe qytete të tjera të vendit, pasi një efektiv policie qëlloi për vdekje 25-vjeçarin Klodian Rasha.
Edhe sot, janë lajmëruar protesta.
