Komiteti shqiptar i Helsinkit ka reaguar sot për vrasjen e të riut, Klodian Rasha nga efektivi i policisë para dy ditësh.
Drejtuesja e këtij komiteti, Erida Skëndaj tha se vrasja e tij është një kambanë alarmi për drejtësinë penale dhe se Prokuroria duhet që të zbardhë sa më parë të gjithë dinamikën e ngjarjes.
Ajo shtoi se familjarët e Klodianit duhet t’u respektohen të drejtat.
“Rasti i Klodian Rashës është një kambanë alarmi për sistemin e drejtësisë penale, ndërkohë që po reformohet dhe është shumë e rëndësishme që Prokuroria të ushtrojë përgjegjësitë e veprës penale. Të zbardhë në mënyrë të plotë dinamikën e ngjarjes.
Të identifikojë dhe të administrojë çdo provë që hedh dritë mbi përgjegjësinë e autorëve dhe të bëjë kulifikimin e drejtë të veprës penale sipas Konventave Europiane që shteti ynë shqiptar i ka ratifikuar dhe i ka bërë pjesë të shtetit ligjor.
Është shumë e rëndësishme që të drejtat e familjarëve të viktimës të respektohen nga organet e sistemit të drejtësisë, sepse edhe këto raste duhet të dëgjohen dhe të informohen për çdo fazë të hetimeve.
Është shumë e drejtë kauza e familjarëve për drejtësi”, ka thënë Skëndaj për Ora News.
