Një tjetër protestë pritet të nisë në orën 18:00 para Ministrisë së Brendshme, në vijim të protestave të zhvilluara një ditë më parë, ku qytetarët shprehën revoltën e tyre për vrasjen e 25-vjeçarit Klodian Rasha nga një efektiv policie, ndërsa kërkuan drejtësi dhe dorëheqjen e Sandër Lleshajt nga posti i ministrit të Brendshëm.
Sot policia ka marrë masa shtesë lidhur me protestën, ndërsa krahas uniformave blu që kanë rrethuar godinën e Ministrisë së Brendshme, janë vendosur edhe barriera hekuri për të krijuar distancën mes qytetarëve dhe policisë.
Një ditë më parë gjatë protestës u regjistruan disa incidente që nisën te Ministria e Brendshme, vijuan te Kryeministria, ndërsa policia përdori gazin lotsjellës dhe sprite paralizues.
Edhe sot duket se në skenarin e policisë është përdorimi i gazit, nëse do të ketë përplasje mes policisë dhe qyetarëve, ndërsa një pjesë e efektivëve në rrethimin e godinës së Ministrisë së Brendshme, kanë edhe pajisjet anti-gaz.
Gjithashtu, masa janë marrë edhe rreth Kryeministrisë, ku duket se janë instaluar edhe efektivët e FNSH, që do të ndërhyjnë vetëm në rast të precipitimit të situatës.
