Nga Gjergji Koja
Kur Bota përgatitet për vaksinimin kundër Covid-19, në Shqipëri Qeveria mburret se siguroi testet e shpejta.
Ministrja e Shëndetësisë, Ogerta Manastirliu, njoftoi sot se nga dita e hënë në Shqipëri do të mbërrijnë testet e shpejta për Covid-19.
Manastirliu tha se janë 100 mijë teste që do të vijnë dhe do të shpërndahen, në kuadrin e asaj që i konsideroi si masat e shtuara të Qeverisë për pandeminë.
Një lajm që do të ishte shumë pozitiv, sikur këto teste të ishin në përdorim, ashtu sikundër janë në shumë e shumë vende, ndërsa në Shqipëri vijojnë të aplikohen testimet “bëje sot, përgjigjen me kismet”.
Të mburresh pas 9 muajsh pandemi se ke siguruar testet e shpejta, në një kohë kur jo vendet e zhvilluara, por edhe Maqedonia e Veriut, po përgatitet për vaksinën, është treguesi më i mirë se sa mbrapa jemi me procesin.
Britania e Madhe ka njoftuar se javën e ardhshme do të nisë vaksinimin, ndërsa miliona doza të siguara, pasi të çerrtfikohen edhe njëherë nga laboratorët, do të shpërndahen në spitale dhe vendet e përcaktuara për vaksinimin.
Maqedonia e Veriut tha se ka aplikuar për 1.6 milion doza vaksine, 800 mijë prej të cilave përmes nismës COVAX dhe pjesën tjetër me tratativat e zhvilluara me dy vende anëtare të BE-së, Poloninë dhe Greqinë.
Gjithashtu në Maqedoni, sipas ministrit të Shëndetësisë atje, mbërrijnë në fillim të janarit frigoriferët, përmes të cilave do të bëhet e mundur ruajtja e vaksinave deri në -70 gradë.
Në Shqipëri konsiderohet arritje sigurimi i 100 mijë testeve të shpejta dhe paralajmërohet nisja e tyre më 6 dhjetor, ndërkohë që në Zagreb ky proces ka të paktën 2 javë që ka nisur, ndërsa në Itali i gjen në çdo farmaci me çmime 3 euro dhe përgjigjia del brenda pak minutash.
Duke lënë mënjanë sasinë e garantuar të këtyre testeve apo çmimin me të cilën ato janë siguruar, në fakt sot ministrja e Shëndetësisë dhe Komiteti Teknik, i cili ka marrë përsipër të menaxhojë situatën e pandemisë, duhej të deklaronin se ku janë me bisedimet apo marrëveshjet për vaksinat.
Me cilat nga kompanitë po diskutohet, me cilat shtete anëtare të BE-së është arritur qoftë edhe një marrëveshje për të garantuar dozat, të paktën ato fillestare për mjekët, mësuesit, personat që konsiderohen me risk të lartë, dhe më pas për masën.
Në fakt asgjë nuk thuhet, përveç deklaratave se Shqipëria ka kryer pagesën e garancisë te COVAX, që vaksina do të jetë falas, kur të sigurohet, dhe që është përjashtuar mundësia për një nga vaksinat, për shkak të kushteve të ruajtjes së saj.
Afërmendsh në situatën globale të pandemisë, qoftë BE apo vendet aleate, nuk do e lenë Shqipërinë pa një vaksinë, por e gjithë kjo situatë tregon se ne jemi vazhdimisht në pritje, me dorën e shtrirë si fakirë, dhe shpresojmë se për shkak të lidhjeve, qoftë edhe strategjike, nuk do na lenë në bisht.
Në kushtet ku vendi ndodhet, kur ende nuk dihet numri real i personave të infektuar, për shkak të numrit të kufizuar të testimeve që kryhen, kur s´ka një panoramë të qartë mbi situatën, garancia e vetme mbetet përgatitja e shpejtë për të siguruar një vaksinë, qoftë edhe kundrejt një pagese, dhe pastaj shteti mund të krijojë pa fund hapësira për të siguruar edhe dozat falas.
Por ne jemi në situatën kur na gëzon sigurimi i 100 mijë testeve të shpejta, që mund të përfundojnë edhe për 5 apo 7 ditë, në kushtet kur 40 % e të testuarve aktualë rezultojnë pozitivë.
Kaq mjafton për të kuptuar se nuk jemi as në nivelin e Maqedonisë dhe nuk është çudi që në muajt e ardhshëm të mendohet vajtja jashtë kufijve për t´u vaksinuar.
