Një burrë i infektuar me koronavirus është larguar nga spitali, por më pas është gjetur i vdekur disa qindra metra më tutje.
Ngjarja ka provokuar zemërim te famila e të ndjerit, në Katerini, Greqi. Burri 47 vjeçar u gjet i pajetë në një fushë afër spitalit shtetëror të Katerinit.
Familja tregoi se kishte më shumë se dy javë që po e kërkonte. I ndjeri, më 13 nëntor përfundoi në spital me simptoma koronavirusi.
Pas ekzaminimeve të kryera, u konfirmua se ai ishte infektuar me Covid-19.
Kjo u përjetua keq nga 47 vjeçari. Dy ditë më pas ai del nga spitali dhe zhduket.
Jani Kemenezi është kushëri i 47 vjeçarit. Ai tregon se e dinin të shtruar në spital dhe kur shkuan për ta parë, i thanë se ishte larguar pa komunikuar me mjekët. Për më tepër, spitali as që e njoftoi familjen për zhdukjen e pacientit.
“E kërkuam për dy javë. Dhe dje në mëngjes na njoftuan se u gjet i vdekur disa qindra metra larg spitalit. Askush nuk u mor me faktin se ai kishte ikur nga spitali. Vërtet ai nuk është burg, por shteti ka institucione që duhet të viheshin në lëvizje.
Ngjarja mbetet e veshur me mister. Dyshimet flasin për një vetëvrasje dhe trupi i të ndjerit u gjet në dekompozim e sipër.
