Kryeministri Edi Rama e ka nisur sot ditën me një sulm ndaj Kryetarit të Partisë Demokratike, Lulzim Basha, në lidhje me debatin për numrin e viktimave nga koronavirusi.
E ndërsa publikon pamjet e spitalit të ri të fëmijëve në Durrës, kreu i qeverisë thotë se opozita edhe të vdekurit i trazon për pushtet.
“Mirëmëngjes dhe me këto pamje nga spitali i ri i fëmijëve Durrës ku shihet qartë dallimi mes errësirës që trashëguam, prej atyre që edhe të vdekurit i trazojnë me luftën e tyre qorre për pushtet dhe ambicies tonë, për shëndetësinë e Shqipërisë që duam ju uroj të gjithëve një të dielë të mbarë” shkruan ai.
Debati nisi mbrëmjen e së enjtes, kur Lulzim Basha denoncoi se qeveria ka fshehur numrin real të viktimave nga koronavirusi duke dhënë shifra të rreme, por Edi Rama e mohoi dhe drejtoi gishtin nga opozita e drejtuar nga kryedemokrati, se po bën politikë me të vdekurit.
