Burime diplomatike të Bashkimit Evropian bëjnë të ditur, se nuk pritet të merret vendim mbi kuadrin negociues me Maqedoninë e Veriut dhe Shqipërinë nesër gjatë takimit të ministrave të Çështjeve Europiane.
Kjo pasi aktualisht nuk ka sinjale nga Bullgaria dhe as nga Maqedonia e Veriut lidhur me një ndryshim të qëndrimit të tyre mbi marrëveshjen e fqinjësisë.
Për kuadrin negociues për Shqipërinë nuk ka kundërshtime, por këto kuadre negociuese nuk mund të aprovohen pa unanimitet në gjirin e shteteve anëtare.
Unanimiteti nuk është i mundur të arrihet, duke qenë se Bullgaria kërkon që të përfshijë në kuadrin negociues me Maqedoninë e Veriut një udhërrëfyes për zgjidhjen e çështjes historike dhe të gjuhës gjatë negociatave të anëtarësimit me Maqedoninë e Veriut.
Burimet diplomatike europiane kane sqaruar, se Ministrat e Çështjeve Europiane mblidhen nesër në video-konferencë, gjë që e ben shumë të vështirë marrjen e një vendimi nesër.
Nëse do ketë ndryshim të qëndrimeve të Bullgarisë dhe Maqedonisë së Veriut, vendimi për kuadrin necociues me të dyja vendet mund të merret përmes procedurës me shkrim.
Por deri tani, sipas burimeve diplomatike, ka pak gjasa që kjo të ndodhë para fundit të vitit. Duke u përgjjiur pyetjes së ABC, nëse për Shqipërinë drafti i konkluzioneve do t’i referohet 2 kushteve që mbeten për t’u përmbushur nga Shqipëira sipas Komisionit Europian apo mund të ndryshojë sipas kerkesave të 5 shteteve anëtare mbi një kushtëzim më të rreptë për Shqipërinë, burimet diplomatike janë përgjigjur:
“Nuk pritet të ketë një diskutim të gjatë mbi kushtëzimin për Shqipërinë. Konferenca e parë ndërqeveritare me Shqipërinë do të mblidhet vetëm kur të jenë përmbushur kushtet.
Kjo bën të kuptohet, se drafti i konkluzioneve për Shqipërinë mund të mbetet në formen e kushtëzimit me dy kushte lidhur me funksionimin e plotë të Gjykatës Kushtetuese dhe të Larte dhe ndryshimin e ligjit për mediat sipas rekomandimeve të Komisionit të Venecias.” /ABCnews/
