Ministri i Brendshëm, Sandr Lleshaj, tha se gjatë vitit 2020 janë shkatërruar 30 grupe kriminale, nga 23 që ishin shkatërruar në 2019.
Lleshaj tha se BE njeh faktin se anëtarët famëkeq të grupeve kriminale ndodhen në burg. Gjatë fjalës së tij, Lleshaj bëri edhe një gafë, kur i cilësoi këto personazhe si personalitete të krimit të organizuar.
“Këto personalitete të botës së krimit, sot ndodhen pas hekurave, dhe ky është një fakt që njihet edhe nga Bashkimi Europian. Madje edhe opozitës i kanë mbaruar ato emrat që përmendte për takime etj etj”, tha Lleshaj.
“Do të konfiskojmë pasuritë e krimit të organizuar”, tha Lleshaj. Sipas tij, Task Force kryhen hetimet penale, ndërsa OFL merret me pasuritë e krimit të organizuar.
“Janë dy operacione apo struktura të ndryshme, njëra merret me hetimet penale dhe tjetra me pasuritë, burimin e tyre”, tha Lleshaj.
Sipas tij, edhe në luftën ndaj kanabisit ka pasur goditje të forta.
“Në vitin 2020, autoritetet italiane kanë kapur vetëm 911 kg, ndërsa në Greqi dhe Malin e Zi shifrat janë më të ulëta. Lazarati ishte një markë e njohur në Europë, madje edhe në restorantet në Holandë, ndërsa sot jemi në minimumin historik”, tha Lleshaj.
Por ministri i Brendshëm duket se harroi te shifrat e raportuara, sasinë prej 2.6 tonë lëndë narkotike, që kaluar qetësisht në Malin e Zi, dhe u kapën atje, ndërsa kamionët me lëndën narkotike ishin ngarkuar në Shqipëri.
Lidhur me “Ilyrian Guard”, Lleshaj tha se ajo u krijua për të vendosur rregull në një treg të shkatërruar.
“Kjo polici ruan 370 institucione shtetërore. Kemi ulur kostot, kemi rritur cilësitë e këtij shërbimi”, tha Lleshaj, duke shtuar se s´ka asnjë përdorim politik të kësaj strukture.
