KPA lë në fuqi vendimin e KPK/ Ish-prokurori Edison Ademi largohet nga sistemi

Kolegji i Posaçëm i Apelimit, KPA, vendosi lënien në fuqi të vendimit të KPK për shkarkimin nga detyra të ish-drejtuesit të Prokurorisë së Sarandës, Edison Ademi.

Në njoftimin e KPA thuhet se, trupi gjykues i përbërë nga Rezarta Schuetz kryesuese, Ardian Hajdari relator dhe anëtarët Albana Shtylla, Natasha Mulaj e Sokol Çomo anëtarë, pasi përfunduan gjykimin e ankimit të ish-prokurorit Ademi në dhomë këshillimi, vendosën në mënyrë unanime ta rrëzojnë atë.

Edison Ademi u shkarkua nga Komisioni i Pavarur i Kualifikimit, KPK më 9 mars 2019, për shkelje të etikës dhe probleme me pasurinë.

Komisioni vlerësoi se ish-prokurori Ademi kishte shkelur etikën për shkak të qëndrimeve kontradiktore në lidhje me njohjen e dy personave për të cilët i kishte kaluar barra e provës në kriterin e profesionalizmit

LEXO EDHE  Parashikimi i motit, çfarë pritet gjatë ditës së martë

Shkelje e etikës profesionale u konsiderua edhe mosprishja e një kontrate qiraje për një sipërfaqe toke me ish-Komunën Qendër Vlorë.

Komisioni konkludoi deklarim të pamjaftueshëm në kriterin e pasurisë.

Në vendimin e KPK thuhet se ai ka kryer deklarime të pasakta e të pamjaftueshme; si dhe deklarim të rremë për shkak të mospasqyrimit në deklaratën veting të të ardhurave të vëllait në emigracion.