Oriola Pampuri, ish-deputete e PD, ka reaguar lidhur me vetëvrasjen e 3 të ndodhur në spitalin “Shefqet Ndroqi” në Tiranë, atje ku po trajtohen të sëmurët nga Covid-19.
Pampuri shkruan në rrjetet sociale se megjithë rastet e përsëritura të vetvrasjeve Ministria e Shëndetësisë nuk ka asnjë masë për psikolog në spitalet COVID.
Sipas saj, situata ka dalë totalisht jashtë kontrolli
“Ministres situata i ka dalë totalisht jashtë kontrollit, papërgjegjshmëria e saj vijon të mbulohet nga komiteti, i cili mbrojtjen më të mirë ka gjetur sulmin ndaj opozitës.
Zgjidhja është siguria e jetës dhe shëndetit të pacientëve, këtu keni dështuar, dhe merreni me sulme.
Ngjarja e rëndë në spitalin “Shefqet Ndroqi”, Covid 2, na prek emocionalisht të gjithëve. I treti rast, brenda pak kohësh, që tronditi sigurisht familjarët, dhe opinionin publik.
Vetëvrasjet ndodhin nën një gjendje të ngarkuar psikologjike, kur personi humbet përgjegjshmërinë, dhe shpresën, dhe një nga rrugëdaljet nga kjo gjendje psikologjike shumë e rënduar, shikon vetevrasjen.
Bazuar në shumë raste të personave që kanë patur një eksperiencë, pra e kanë kaluar Covid 19, theksohet që përpos simptomave të tjera, ka qenë dhe ngarkesa psikologjike, e shprehur si formë paniku, kjo nxitur dhe nga përballja me dicka të panjohur për të cilën di shumë pak ose aspak, duke i shtuar kësaj dhe informacionet që dëgjon, të ben të ndjesh pasiguri dhe ankth”, shkruan Pampuri.
