Real Madrid fiton dhe merr kryesimin, Hazard rikthehet me gol

Real Madrid po shfaqet me dy fytyra teksa zhgënjimet e Champions League, nuk i pasqyron në kampionat.

Pas triumfit në El Clasico ndaj Barcelonës, mori një tjetër sukses, këtë herë 4-1 në “Alfredo di Stefano” përballë modestëve të Huesca-s.

“Los Blancos” e nisën mirë ndeshjen, por vuajtën jo pak për zhbllokimin e rezultatit, pasi miqtë ishin rreshtuar mirë mbrapa dhe dilnin shpejt në kundërsulm, duke kërcënuar portën e mbrojtur nga Courtois.

Goli i parë erdhi në minutën e 40’ dhe u shënua pikërisht nga belgu Eden Hazard me një gjuajtje perfekte nga distanca, ndërsa vlen të theksohet se ky ishte goli i dytë i tij me fanellën e Realit, që kur u transferua verën e 2019-ës në Madrid.

LEXO EDHE  Është jashtë planeve të Juventusit, Khedira mund të rikthehet në Bundesligë

Vetëm 5 minuta më vonë ishte radha e Karim Benzema që të shënojë edhe golin e dytë, pas një pasimi të Lucas Vasquez, ndërsa në fillim të pjesës së dytë francezi asistoi për Valverden, i cili dërgoi topin në rrjetë për herë të tretë.

Ferreiro shënoi golin e vetëm 15 minuta para fundit, ndërsa në të 90-ën ishte sërish Benzema që vulosi suksesin 4-1, duke kompletuar edhe dopietën personale.

Me këtë fitore Reali ngjitet i vetëm në krye të renditjes me 16 pikë, dy më tepër se Real Sociedad që mban vendin e dytë.