Gjykata Penale e Tiranës ka lënë në fuqi masën e sigurisë “Arrest me Burg” për ish-drejtorin e OST, Klodian Gradeci.
Gradeci akuzohet për shpërdorim detyre, teksa u arrestua pak ditë më parë në aeroportin e Rinasit. Drejtori i Hidrokarbureve, i shpallur në kërkim për abuzimin 1.4 mln dollarë, është vetëdorëzuar.
Ish-drejtori i OST ka kërkuar një masë më të butë sigurie, me argumentin se është sëmurë, por kërkesa nuk është marrë parasysh nga trupi gjykues.
Klodian Gradeci dha dorëheqjen nga OST pas skandalit me DH Albania, një kompani fantazmë e cila fitoi tenderin prej 12 milionë eurosh për linjën e transmetimit të energjisë Burrel-Peshkopi.
Theksojmë këtu se e njëjta kompani falsifikoi dokumentet si e regjistruar në shtetin Delaware në Shtetet e Bashkuara dhe fitoi tenderin 20 milionë euro të Unazës së Madhe, gjë që çoi vetëm në hetimin e një personi të dorës së dytë, edhe pse dyshimet ishin se pas kësaj megaafere të qendronte kompania Gener 2 në pronësi të biznesmenit Bashkim Ulaj.
Pasi skandali mori përmasa të mëdha asokohe, Gradeci u largua nga detyra që mbante, dhe vetëm pak kohë më pas iu besua një tjetër detyrë të rëndësishme, në krye të AKBN. Një vit më pas ai u shpall person në kërkim për një tjetër skandal në zyrën e radhës të shtetit, për t’u arrestuar disa ditë më parë në aeroportin e Rinasit.
