Nga Boldnews.al
Një komunikim rutinor me Inspektoratin e Lartë të Deklarimit dhe Kontrollit të Pasurive e Konfliktit të Interesave (ILDKPKI), zbuloi një rrethanë ligjore që vendos në pikëpyetje të gjithë procesin e Vetingut të zyrtarëve të Policisë.
Anëtarët e trupat kontrolluese, nuk deklarojnë pasurinë dhe, si rrjedhojë, as nuk janë subjekt i kontrollit, megjithëse ata kryejnë verifikimet financiare për shefat e policisë.
“Boldnews.al”, nëpërmjet një shkrese zyrtare, kërkoi nga ILDKPKI një kopje të deklaratave të pasurisë së anëtarëve të Komisionit të Jashtëm të Vlerësimit (KJV), strukturë e cila kryen vetingun e drejtuesve të lartë policorë.
Në përgjigje të kërkesës, ILDKPKI njoftoi redaksinë se “në zbatim të ligjit nr. 9049 (për Deklarimin e pasurive” shën.red),…anëtarët e Komisionit të Jashtëm të Vlerësimit, nuk përfshihen në kategorinë e subjekteve që mbartin detyrim për deklarim të interesave private (pasurisë)”.
Komisioni i Jashtëm i Vlerësimit (KJV) u krijua në bazë të ligjit 12/2018 “Për vlerësimin kalimtar të Punonjësve të Policisë së Shtetit, Gardës së Republikës dhe SHÇBA”, në bazë të një iniciative të ish-Ministrit të Brendshëm, Fatmir Xhafaj.
KJV përbëhet nga 15 anëtarë. Pesë prej anëtarëve janë caktuar nga radhët e inspektorëve të ILDKPKI, 5 nga trupa pedagogjike dhe 5 janë në bazë të një procedure konkuruese.
Përveç inspektorëve të ILDKPKI, të cilët deklarojnë prej vitesh pasurinë, 10 anëtarët e tjerë, siç rezulton nga komunikimi zyrtar me institucionin që kontrollon financat e të gjithë zyrtarëve të lartë shtetërorë, nuk kanë detyrim të plotësojnë formularët me pasuritë e paluajtshme dhe të luajtshme të tyre, si edhe detyrimet financiare.
Ky standart, i aplikuar për anëtarët e Komisionit të Jashtëm të Vlerësimit, bie ndesh jo vetëm me frymën që karakterizon ligjin për deklarimin e pasurive, por edhe me të gjithë procesin e Vetingut dhe Reformën në Drejtësi në përgjithësi.
Vetingu në Polici, ashtu si edhe në sistemin e drejtësisë, bazohet në tre shtylla kryesore; kontrollin e pasurisë, integritetit personal dhe aftësive profesionale.
Nga renditja ligjore, kriteri i pasurisë konsiderohet primari në rivlerësimin e subjekteve të ligjit.
Duket e pakonceptueshme që kontrollorët e pasurisë së oficerëve të Policisë, nga ana e tyre të mos jenë të kontrollueshëm dhe të mungojnë mekanizmat për të siguruar se ata gëzojnë integritetin e plotë, sidomos në aspektin financiar.
Komisioni i Jashtëm i Vlerësimit, së fundmi, është përfshirë nën dyshime të forta, për shkak të vendimmarrjeve të diskutueshme.
Një trupë e këtij Komisioni konfirmoi në detyrë Drejtorin e Përgjithshëm të Policisë, Ardi Veliu, megjithëse të dhënat e siguruara nga vetë ai institucion, ngrinin pikëpyetje mbi ligjshmërinë e burimit për krijimin e aseteve të paluajtshme nga numri Një i uniformave blu.
Po ashtu, KJV konfirmoi në detyrë drejtuesin e lartë të Operacionit “Forca e Ligit”, Artan Shkëmbi, i cili më pas u pezullua nga detyra, pasi Prokuroria Speciale SPAK siguroi informacione nga autoritetet gjermane për “korrupsion” dhe “nxjerrje të sekretit hetimor”.
Ndryshe nga dy rastet e mëparshme, Komisioni i Jashtëm i Vlerësimit u përfshi në një vorbull kritikash mediatike dhe në rrjete sociale, pas shkarkimit të drejtuesit të lartë policor, Arben Frashëri.
Në bazë të të dhënave publike, rezulton se KJV e shkarkoi Frashërin pasi nuk justifikonte të ardhurat e siguruara në emigracion, të cilat më pas i përdori për blerjen e një apartamenti modest, krahasuar me atë të Ardi Veliut dhe kolegëve të tjerë të tij, të cilët e kanë kaluar pa problem procesin e Vetingut.
