Kryebashkiaku Erion Veliaj, drejtues politik i PS-së për Bashkinë e Tiranës, ka vijuar edhe sot akuzat ndaj kreut demokrat Lulzim Basha.
Veliaj ishte në Petrelë, ku vizitoi dy familje, banesat e të cilëve ishin shembur nga tërmeti dhe u rindërtuan.
“Falenderoj Agron Papulin, të cilit i morëm dy shtëpi, për dy familje. Ne nuk jemi si Lulzim Basha, që edhe ai i ka marrë dy shtëpi Gon Papulit, por i ka marrë për kunatin dhe interesa të tjera.
Ne ia morëm për dy familje, Luli ia mori për kunatin. Ky është dallimi me ata, se ne nuk bëjmë shantazh. Sipërmarrësit paguajnë taksa dhe ne me taksat e tyre bëjmë investime publike, nuk i shantazhojmë për interesa të caktuara”, tha Veliaj.
Prej disa javësh Erion Veliaj vijon fushatën në Bashkinë e Tiranës në kuadrin e zgjedhjeve parlamentare të 25 prillit, ndërsa ka artikuluar akuza ndaj kreut demokrat Lulzim Basha. Për akuzat që ka hedhur ndaj Bashës, kreu i Bashkisë është kallzuar penalisht për shpifje.
Duket se detyra që i është caktuar Veliajt për zgjedhjet e 25 prillit janë sulmet dhe akuzat ndaj Bashës, ndërsa ky i fundit është përqëndruar në atë që e konsideron si plani i Rimëkëmbjes ekonomike. Basha ka ftuar Ramën në debate publike, ky i fundit e ka refuzuar deri më tani, ndërsa Veliaj vijon sulmet dhe akuzat.
