Lufta kundër Covid-19 kërkon testime të shumta dhe ndryshe nga Gjermania e cila ka bërë 20 milionë, Shqipëria ka bërë vetëm 106 mijë.
Mjeku Erion Dasho, teksa ka bërë krahasime sesi po e përballon qeveria Rama, pandeminë e Covid-19, thotë se Gjermania zbaton devizën testo-gjurmo-trajto ndoshta më mirë se çdo vend tjetër në planet.
Duke e lidhur me vendimin e qeverisë për mbajtjen e maskës edhe në mjedise të hapura, mjeku nënvizon se nuk është kjo zgjidhje por vetëm testimet e shumta.
Postimi nga Erion Dasho
Gjermania ka bërë 20 milionë teste për Covid-19, madje me teknologjinë Bosch teston për më shumë se 10 viruse me një tampon! Gjermania ka aplikacione gjurmimi epidemiologjik, hartëzimi, dashboarde menaxhues, dhe një popullsi të tërë që i mban non stop app-et gjurmues aktivë në celular! Gjermania ka sistem kërkimor që bazohet tek Instituti Robert Koch, tek dhjetëra universitete dhe qindra biznese private që realizojnë disa nga projektet shkencorë më të avancuar në botë!
Gjermania është në pararojë të prodhimit të vaksinës së parë të efektshme dhe të sigurt! Gjermania ka spitale të sigurta, transport të sigurt, vende pune të sigurta, administratë të sigurt dhe një mjedis social që mbështet sigurinë lidhur me Covid-19.
Gjermania ka ngritur sistem trajtimi, monitorimi dhe referimi zinxhir nga mjeku i familjes deri tek spitali terciar! Gjermania trajton me efektivitet çdo rast dhe ka vdekshmëri reanimatore ndër më të ultat në botë duke intubuar jashtëzakonisht pak pacientë!
Pra, Gjermania zbaton devizën testo-gjurmo-trajto ndoshta më mirë se çdo vend tjetër në planet! Së fundi, qytetarët gjermanë respektojnë edhe mbajtjen e maskave në mjedise të mbyllura dhe, sigurisht, edhe distancimin fizik! Të thuash se Gjermania ka sukses në kontrollin e epidemisë sepse mban maska, është sikur të pretendosh se Usain Bolt fitonte medalje sepse mbante këpucë me ngjyra të ndryshme.
