Një javë më parë, kryeministri Edi Rama bëri me dije vendimin për mbajtjen e maskave me detyrim edhe në ambient të jashtëm.
Prej datës 15 tetor çdo qytetar është i detyruar të mbajë maskën në ambientet publike, ndërsa shkelësit janë ndëshkuar me gjoba.
Pavarësisht se vetë Rama u shpreh se i ka kërkuar policisë të jetë e kujdesshme, duket se qëllimi i saj është të vendosë sa më shumë gjoba.
Dhe në vetëm 3 ditë nga fyrja në fuqi e vendimit, Policia e Shtetit zbulon se ka vënë 1191 masa administrative prej 3 mijë lekësh. E përkthyer në gjuhën e shifrave arrijnë në 3 milionë e 573 mijë lekë. Nga ana tjetër, nuk kanë munguar as qytetarët e shoqëruar në polici, 21 të tillë të cilët nuk kishin mjet identifikimi me vete apo kundërshtuan punonjësin e policisë.
Vendimi për mbajtjen e maskave në ambientet e hapura ka ndezur debate, pasi nuk ka një studim të mirëfilltë që tregon se maska të mbron në këto mjedise.
Madje edhe vetë mjekët janë të ndarë në qëndrimet e tyre, ndërsa duket se më shumë se një vendim shkencor, ai është një vendim politik.
Të angazhuar për zbatimin e këtij rregulli janë efektivët e policisë së rendit, rrugores dhe specialistët e zonës. Monitorimi i qytetarëve në rrugë apo në zona të banuara kryhet nga efektivët e policisë së rendit dhe specialistët e zonës.
Për kontrollin e automjeteve janë angazhuar punonjësit e policisë rrugore , me qytetarët të cilët në rast se udhëtojnë të vetëm nuk e kanë detyrim mbajtjen e maskës, ndërsa barriera mbrojtëse duhet përdorur në rast se në makinë qarkullojnë më shumë se 2 persona.
Në rastet kur qytetarët konstatohen pa maskë dhe me vete nuk disponojnë kartën e ID, efektivi do të ndërmarrë shoqërimin e tij në komisariat për të bërë identifikimin e tij e më pas vendosjen e masës administrative.
Edhe pse qeveria vendosi që maskat do të mbahen kudo, qytetarët ankohen se çmimet e këtyre barrierave mbrojtëse janë të larta krahasuar me të ardhurat e tyre. Mbajtja e maskave për një kohë të gjatë u ka sjellë problem të moshuarve, që thonë se ndiejnë vështirësi në frymëmarrje. Bluzat e bardha rekomandojnë që maska të ndërrohet shpesh, pasi akumulon sasi bakteresh, por në pamundësi për të blerë maskën kirurgjikale, shumë qytetarët kanë zgjedhur te mbajnë ato artizanale shumë përdorimshe.
