Ministrja e Shëndetësisë, Ogerta Manastirliu, u përball në emisionin “Opinion” me denoncimin e një gazetareje, e cila i tha se ka pritur plot 5 ditë për të marrë përgjigjen e tamponit.
“E kam bërë tamponin të shtunën dhe përgjigjen e mora të mërkurën e javës së kaluar. Pse ndodh kjo, në Maqedoninë e Veriut apo në Kosovë, përgjigjet dalin shumë më shpejt. Kam raste kur burri ka qenë me Covid-19 dhe bashkëshortes nuk i është bërë tamponi”, tha gazetarja në emisionin Opinion.
Por ministrja tha se pavarësisht se denoncimet ishin publike, ato duhen të verifikohen.
“E rëndësishme është që ju s´keni gjë, pra jeni mirë me shëndet. E dyta, është se unë duhet ti shikoj këto rast pas rasti, pra për të parë se çfarë ka ndodhur. Por fakti që epidemiologët ju kanë kontaktuar, tregon se rasti është ndjekur, pra janë ndjekur kontaktet. Unë e kuptoj që njerëzit presin të marrin përgjigjen dhe të dalin me vrap nga shtëpia, por janë disa protokolle që duhen zbatuar dhe gjithkush duhet të qëndrojë i izoluar derisa të marrë përgjigjen”, tha Manastirliu.
Ndërkohë lidhur me spitalet Covid3 dhe Covid4, Manastirliu tha se janë të mirëpajisur dhe janë 150 infermiere që janë trajnuar gjatë muajve të verës.
“Me mjekët jemi organizuar me mjekë infeksionistë, të QSUT, të familjes, që i kemi trajnuar dhe do të shërbejnë në spitalet. Kemi 25 % të spitaleve Covid1 dhe Covid2 të lira”, tha Manastirliu.
