Partia Demokratike, përmes Sekretarit për Burimet Njerëzore, Ervin Minarolli, ka denoncuar atë që e quan, vjedhja me rrugën Korçë- Ersekë.
“Rruga u zvarrit për të vjedhur. 20 milionë euro për 4 km rrugë”, tha Minarolli.
Nga Qafa e Qarrit, në rrugën Korçë – Ersekë, Minarolli ka denoncuar ndërtimin e Lotit të dytë të kësaj rruge e cila ndërtohet me një vlerë prej 4 milionë Euro për km.
“20 milionë Euro për 4 km e rrugës do të ishin të mjaftueshme për të ndërtuar rrugën nga këtu e deri në Ersekë, por qeveria ka zgjedhur të pesëfishojë kostot në mënyrë që të pasurojë klientët e saj.
Kjo rrugë është krijuar me një kosto prej 15 milionë Euro për 18 km, që do të thotë rreth 0.8 milionë euro për km.
Është anuluar projekti i parë i cili parashikonte një vlerë prej 1 milionë Euro për km ndërkohë që janë rritur dukshëm kostot në mënyrë abuzive prej gati 5 herë për të favorizuar klientët e qeverisë.
Kjo nuk ka ndodhur vetëm me këtë projekt, kjo ndodh me të gjitha projektet në Shqipëri dhe shumë prej rrugëve të cilat sot janë akoma në 3D do të ishin ndërtuar sepse ka pasur projekte ekzistuese”, tha ai.
