Disa ditë më parë, ministri i Turizmit dhe Mjedisit, Blendi Klosi, shkaktoi një seri reagimesh me meme, batuta dhe humor në rrjetet sociale, pasi deklaroi se muzika përhap më shpejt koronavirusin.
Ndërsa fliste për mediat, Klosi duke justifikuar faktin se klubet e natës nuk lejohet të funksionojnë apo vendimin që ndalon muzikën në orët e mbrëmjes në lokale, tha se përmes saj përhapet më shpejt koronavirusi.
Deklarata e ministrit të Ramës u pasua me një seri reagimesh, që më shumë vinin në lojë ministrin, i cili si për të treguar se kishte të drejtë, tha se për këtë kishte edhe një studim.
Por, Klosi sqaroi se nuk ka dashur të thotë se është muzika ajo që të infekton. Sipas tij, një vend me muzikë të lartë ndryshon sjelljen e njerëzve pasi krijohet një ambient më dinamik dhe shtohen rrymat e ajrit që vijnë nga kondicioneri.
“E përsëris edhe njëherë muzika nuk te infekton. Përsa i përket komunitetit të atyre njerëzve që jetojnë me muzikën i kërkoj ndjesë, pasi janë më të goditurit sidomos gjatë periudhës së verës.
Përsa i përket atyre që u morën me meme, është një humor i bukur. Valët në një ambient të mbyllur krijojnë një dinamikë dhe shtojnë rrymat e ajrit që vijnë nga kondicionimi, njerëzit lëvizin më shumë djersiten më shumë, rrinë të gjithë se bashku e rreziku shtohet shumë më tepër.
Qënia në një ambient me muzikë për njerëzit ndryshojnë sjellje nga lëvizjet nga energjia, janë të gjitha këto që shtojnë rrezikun për infektim”, u shpreh Klosi në Top Talk.
