“Kompromiset bëhen me parimin që të gjithë të mërziten nga pak dhe jo që të gjithë të kënaqen më shumë. Shikoni se kush është mërzitur më shumë, dhe ata që janë mërzitur më shumë janë ata që do të humbasin zgjedhjet”, tha Kryeministri Edi Rama, ndërsa akuzoi Presidentin Ilir Meta se po kërkon të nxisë ndasi, rrëmujë për të përfituar nga sherrnaja që të fitojë si i treti i vërteti.
Rama tha se Ilir Meta do të jetë humbësi më i madh i zgjedhjeve, do të marrë atë që meriton nga një palë zgjedhje.
“Nuk është Shqipëria që i ka borxh Ilir Metës, por ai i ka borxh Shqipërisë, sikundër secili nga ne. Ilir Meta u bë Kryeministër, Kryetar i Kuvendit dhe President, çfarë do më shumë? Do të pësojë humbjen më të thellë, atë që meriton realisht”, tha Rama, duke shtuar se ndaj edhe ai është më i mërzituri.
Rama tha se edhe ai vetë nuk është i kënaqur nga ndryshimet në Kodin Zgjedhor, por nuk është i mërzitur pasi nuk do i humbasë zgjedhjet.
I pyetur lidhur me ftesën për debat publik me Lulzim Bashën, kryetar i PD, Rama tha se nuk ka asnjë vlerë një debat i tillë.
“Për çfarë të debatojmë? Një parti që bën gjoja një përzgjedhje kandidatësh me votë kontestuese dhe nga 40 emra heqin vet një, po të tjerët kush do i zgjedhë? Për çfarë të debatojmë, a ke temperaturë apo jo, ku do kandidosh? Na thonë 6 muaj para zgjedhjeve keni kopjuar programin tonë, pse muhabet është ky”, tha Rama.
