Ish-Kryeministri Sali Berisha ka reaguar pas mbledhjes së përbashkët mes Qeverisë Rama dhe asaj Hoti, e cila u mbajt në Tiranë.
Berisha shkruan se si në të gjitha mbledhjet e mëparshme u firmosën shumë marrëveshje, u bë fjalë për shumë projekte në 3D e 6D etj.
Ndërsa shkruan se ka përshëndetur me sinqeritet mbledhjen e parë madje edhe të tjera, Berisha thekson se mjerisht bilanci i të gjitha mbledhjeve të përbashkëta dhe politikës së 7 viteve të fundit të Edvin Kristaq Zografit ndaj Kosovës është jo zero, por i frikshëm rrezikshëm dhe thellësisht negativ.
“Unë nuk jam kundër mbledhjeve të përbashkëta dhe falenderoj qeverinë e Kosovës për promovimin e idesë së hekurudhës Prishtinë- Tiranë, por duke përfunduar ju ftoj të urojmë që shqiptarët të shpëtojnë një minutë e më parë nga mbledhjet fallco të Edvin Kristaq Zografit”, shkruan Berisha.
Nga Sali Berisha
Sot në Tiranë u zhvillua mbledhja e gjashtë e radhës midis narko-qeverisë së Tiranës dhe qeverisë së Kosovës.
Si në të gjitha mbledhjet e mëparshme u firmosën shumë marrëveshje, u bë fjalë për shumë projekte në 3D e 6D etj.
Unë kam përshëndetur me sinqeritet mbledhjen e parë madje edhe të tjera, por mjerisht bilanci i të gjitha mbledhjeve të përbashkëta dhe politikës së 7 viteve të fundit të Edvin Kristaq Zografit ndaj Kosovës është jo zero, por i frikshëm rrezikshëm dhe thellësisht negativ. Ky bilanc mund të përmblidhen në:
1- Përpjekje antikombëtare nga Zografi bis për ndarjen dhe copëtimin e Republikës së Kosovës.
2- Rikthimi i luftës së ftohtë si në kohën e Enver Hoxhës ndaj Prishtinës zyrtare dhe udhëheqjes politike të Kosovës.
3- Asnjë mbështetje për njohje ndërkombëtare nga Tirana për Kosovën.
4- Bllokimi nga Franca, për shkak të Shqipërisë dhe krimit të organizuar shqiptar, i liberalizimit të vizave për Kosovën
5- Zero investime në 7 vite nga Tirana për projekte të integrimit midis dy vendeve.
6- Vendosja nga Edvin Kristaq Zografi Bis e taksës antikombëtare, anti-Kosovë dhe anti-veri në Rrugën e Kombit.
6- Linja e ndërlidhjes energjetike Tiranë – Prishtinë e projektuar, financuar nga qeveria gjermane dhe tenderuar para vitit 2013 ende nuk funksionon.
8- Dhjetëra marrëveshje, të gjitha pa përjashtim në letër dhe projekte në 3D.
Miq, në tetë vite para këtyre, 2005-2013 nuk pati asnjë mbledhje të përbashkët të dy qeverive por:
1- Pavarësia e Kosovës u shpall në Tiranë në qershor të vitit 2007 nga Presidenti George W Bush.
2- U lobua pranë dhjetëra e dhjetëra vendeve për njohjen e shtetit të pavarur të Kosovës.
3- Shqipëria angazhoi juristët më të famshëm të Evropës për mbrojtjen e Pavarësisë të Kosovës, të paditur nga Serbia në Gjykatën Ndërkombëtare të OKB në Hagë dhe Kosova fitoi
4- Kërkesat e Beogradit për “shkëmbim territoresh, ndryshim kufijsh të Kosovës morën përgjigje kategorike negative nga Tirana dhe Prishtina zyrtare.
5- U ndërtua Rruga e Kombit dhe të gjitha rrugët që lidhin Shqipërinë me Kosovën si:
-rruga Sopot – Qafë Morinë,
-rruga Golaj – Qafë Prush,
-pjesa më e vështirë e rrugës Kukës Shishtavec.
6- U hodh ideja dhe u lobua për hekurudhën Tiranë – Prishtinë.
7- U projektua, u sigurua financimi dhe u tenderua autostrada energjetike midis dy vendeve, e cila akoma nuk është vënë në përdorim
8- U ndërtua autostrada dixhitale Tiranë – Prishtinë.
9- U hodhën bazat e bashkimit të sistemit arsimor, doganor etj.
Të gjitha këto me zemër dhe pa asnjë mbledhje të përbashkët midis dy qeverive.
Ju siguroj miq se unë nuk jam kundër mbledhjeve të përbashkëta dhe falenderoj qeverinë e Kosovës për promovimin e idesë së hekurudhës Prishtinë- Tiranë, por duke përfunduar ju ftoj të urojmë që shqiptarët të shpëtojnë një minutë e më parë nga mbledhjet fallco të Edvin Kristaq Zografit.
