Kryeministri Edi Rama, nga Kopenhagen, u mburr se Shqipëria ka “një nga mbrojtjet më të forta kibernetike në Europë” dhe se sistemi i ri i qeverisë, DIELLA, po funksionon pa probleme.
Por realiteti i fundit është ndryshe. Vetëm në qershor, faqja zyrtare e Bashkisë së Tiranës u godit nga hakerët iranianë të grupit “Homeland Justice”. Ata e nxorën jashtë funksionit, morën të dhëna dhe madje pohuan se i kishin fshirë serverët. Për pasojë, edhe shërbimet online të qytetit, si regjistrimi i fëmijëve në kopshte, u pezulluan.
Sulmi nuk ishte i pari. Ky grup ka goditur edhe më herët institucione dhe kompani shqiptare, duke nxjerrë në publik të dhëna sensitive.
“Homeland Justice”, ka funksionuar që nga korriku 2022, duke orkestruar në mënyrë specifike sulme shkatërruese kundër Shqipërisë.
Më 24 dhjetor 2023, ai u rishfaq pas një ndërprerjeje, duke deklaruar se “është kthyer për të shkatërruar mbështetësit e terroristëve”, duke e përshkruar fushatën e tij të fundit si #DestroyDurres MilitaryCamp.
