Zgjedhjet e kandidatëve në PD, anëtarësia po eleminon të “përkëdhelurit”/ Zgjedhje e duhur apo…

Partia Demokratike ka nisur procesin e përzgjedhjes së kandidatëve për deputet me votimet nga anëtarësia, që përbën edhe fazën e dytë, në përcaktimin e emrave që do të vijonë garën e brendshme.

Deri më tani procesi është përmbyllur në 4 qarqe: Kukës, Dibër, Gjirokastër dhe Berat, ku nuk kanë munguar suprizat.

Kështu në Kukës janë skualifikuar dy emra jo pak të njohur në strukturat lokale, Bashkim Shehu, ish-kryebashkiak i Kukësit dhe Besnik Dushaj, ish-kryebashkiak i Tropojës.

Në Dibër gjithashtu emrat e njohur në listë janë kualifikuar, ndërsa janë skualifikuar disa kandidatë të propozuar nga baza e partisë në fazën e parë të paraqitjes së kandidaturave.

Gjithashtu në Gjirokastër, procesi ka kaluar pa supriza, pasi emrat e skualifikuar gjithashtu nuk kishin mbajtur pozicione apo poste të caktuara publike.

Në Berat, ka vijuar surpriza e Kukësit, ku demokratët me votën e tyre kanë nxjerrë jashtë listës ish-deputetin Astrit Veliaj. Megjithëse mund të konsiderohej nga emrat më të njohur, për shkak se kishte dy mandate si deputet në qarkun e Beratit, mandatin e dytë e mori pas tërheqjes së Eduart Halimit, Veliaj duket se nuk ka “ngjitur në bazën” e demokratëve.

Vota kontestuese e ka identifikuar si kandidatin më pak të duhur apo me mbështetjen më të vogël mes rradhëve të demokratëve, duke mos i dhënë mundësinë që të vijojë garën e brendshme.

LEXO EDHE  Infektohen 6 edukatore, mbyllet kopshti me 100 fëmijë

Kështu në 4 qarqe, ku janë zhvilluar zgjedhjet deri më tani, janë të paktën 3 emra të njohur, dy në Kukës dhe 1 në Berat, që janë përjashtuar nga vijimi i garës.

Ndoshta surprizë, ndoshta vendim i drejtë i anëtarësisë që për herë të parë ka në dorë përzgjedhjen e kandidatëve për deputet, qoftë edhe me votë kontestuese, ose një keqkuptim.

Votimet e deritanishme kanë treguar se ata që kanë pasur një pushtet, qoftë edhe si të emëruar drejtpërdrejtë si kandidatë në zgjedhjet e mëparshme, ose nuk ka ditur të fitojnë besimin e anëtarësisë, ose nuk kanë lënë gjurmë në punën e tyre, sipas pozicioneve që kanë pasur.

Berati e tregoi këtë me rastin Veliaj, i cili i renditur në listat shumëemërore të PD, përfitoi dy mandate deputetësh, ndërsa sot nuk arriti të marrë verdiktin e bazës për të vijuar garën.

Zgjedhjet në qarqet e tjera do të vijojnë me Shkodrën, për të pasuar më pas me të tjera degë në qarqe, ku ndoshta sërisht do të ketë “eleminime” të kandidatëve me emër.

Duket se anëtarësia është “zgjuar” dhe po imponon me votën e saj emrat që parapëlqen ti ketë si kandidatë në Parlamentin e arshshëm, më pak të njohur në Tiranë, por me prezencë më të madhe në rradhët e anëtarëve.