Kryetari i Grupit Parlamentar të Partisë Socialiste, Taulant Balla, deklaron se lista e kandidatëve të partisë apo të koalicionit zgjedhor do të jetë 100% e hapur.
Përmes një postimi në rrjetin social, Balla thekson se çdo zgjedhës ka të drejtën që krahas partisë apo koalicionit zgjedhor të vendosë shenjën edhe tek emri i një kandidati/kandidateje të preferuar.
Sipas Ballës, nuk ka sisteme elektorale perfekte dhe as sisteme elektorale që u japin pakicave fitoren ne tavoline nuk jane shpikur akoma!
“Lista e kandidatëve të partisë apo të koalicionit zgjedhor do të jetë 100% e hapur. Të gjithë kandidatët në listë i nënshtrohen votimit parapëlqyes nga zgjedhësit.
Çdo zgjedhës ka të drejtën që krahas partisë apo koalicionit zgjedhor të vendosë shenjën edhe tek emri i një kandidati/kandidateje të preferuar. U jepet e drejta zgjedhësve që të ndryshojnë renditjen e kandidatëve dhe respektivisht ndarjen e mandateve duke vlerësuar ata kandidatë që demonstrojnë që gëzojnë një mbështetje të madhe, edhe mbi vet renditjen e partisë që i propozon.
Një parim i tillë aplikohet në një sërë vendesh me sistem të ngjashëm elektoral ku zgjedhësit kanë të drejtë të ri-rëndisin kandidatët e rrjedhimisht mandatet e fituara elektorale. Në vëmendje mund të sjellim shembujt e Austrisë, Kroacisë, Republikës Çeke, Suedisë”, shkruan Balla.
