Damian Gjiknuri, përfaqësues i PS në Këshillin Politik, i la afat opozitës së bashkuar afat deri të premten për të depozituar draftet për çështjen e koalicioneve dhe formulës së shpërndarjes së mandateve. Por opozita nuk do të depozitojë asnjë draft në mbledhjen e së premtes.
Njëra nga arsyet se përse përfaqësuesi i mazhorancës në Këshillin politik Damian Gjiknuri refuzon kërkesën e opozitës për t’ju drejtuar ODIHR-it, është se nuk ka një draft konkret mbi të cilin palët ti kërkojë atij opinion. Por, Kaso ka një qëndrim tjetër për këtë çështje.
Burime nga Partia Demokratike bëjnë me dije se në rast të refuzimit sërish nga mazhornanca, opozita do ti drejtohet e vetme ODIHR-it për ti kërkuar një opinion për çështjet që nuk kanë dakordësi në këshill.
Sipas Sekretarit për Çështjet Zgjedhore në PD, Ivi Kaso, këto janë ndryshime të propozuara nga mazhoranca, dhe i takon asaj t’i detajojë.
“Do të ishte në seriozitetin e tryezës së Këshillit Politik, por edhe këtij propozimi të maxhorancës në qoftë se do ishte e vërtetë, që mazhorcana e cila me forcën e kartonit ka imponuar ndryshime të njëanshme Kushtetuese, të vinte të sqaronte jo vetëm Këshillin Politik por edhe të gjithë shqiptarët mbi vizionin e saj se si këto ndryshime kushtetuese do të përktheheshin në amendamente në Kodin Zgjedhor”, tha Kaso, raporton Euronews.
Opozita vazhdon të këmbëngulë në kërkesën e saj për t’ju drejtuar OSBE/ODIHR-it, për çështjet që nuk ka dakordësi. E kundërta sipas Kasos, do të ishte në kundërshtim me marrëveshjen e 14 janarit.
“Palët në raport me çështjen e heqjes së koalicioneve kanë një qëndrim diametralisht të kundërt, dhe këtu kërkohet në bazë të dokumentit të 14 janarit ekspertiza e ODIHR”, shtoi Kaso.
