Miqësorja Kukësi-Bylis është ndërprerë në fillimin e pjesës së dytë. Shkak është bërë një sherr mes futbollistëve të të dyja skuadrave.
Shkak për tensionin kanë qenë ndërhyrjet e rënda, që kanë sjellë edhe ndërhyrje të qëllimshme më pas. Në fushë kanë zbritur edhe stafet e të dyja ekipeve, për të qetësuar gjakrat.
Në momentin e ndërprerjes së lojës rezultati ishte 0-1 në favor të Bylisit, falë golit të Ntephe në pjesën e parë.
Një tjetër episod dhune regjistrohet kështu në futbollin shqiptar, teksa rasti më i fundit ishte vetëm pak ditë më parë në takimin Turbina-Dinamo e cila u ndërpre për shkak të një sherri.
