Presidenti Ilir Meta ka dekretuar datën 25 prill për mbajtjen e zgjedhjeve parlamentare, ndërsa partitë duket se kanë ndezur motorët e fushatës, duke u marrë me organizime strukturash apo përzgjedhje emrash për deputetë.
Kryeministri Edi Rama ka formalizuar drejtuesit politikë sipas qarqeve, të cilët mendohen se do të drejtojnë edhe fushatën e socialistëve në zonat ku janë të deleguar.
Rama është zhvendosur nga Vlora drejt Durrësit, duke zëvendësuar Vangjush Dakon, ish-kryebashkiakun, emri i të cilit ndodhet në listën e zezë të DASH, dhe rrezikon të humbasë edhe vendin si anëtar në Kryesinë e PS-së.
Ndërkohë që ka rikthyer gardën e vjetër duke lënë jashtë loje ministrat, me shumë pak përjashtime, Rama duket se do të zyrtarizojë emrat në mbledhjen e Asamblesë Kombëtare, e cila sikundër mësohet nga burimet brenda PS-së, nuk do të mblidhet as në datën 11 shtator, sikundër ishte paralajmëruar më parë. Duket se shkak për shtyrjen sërisht të mbledhjes është mbajtja pezull e ndryshimeve qoftë në Kryesinë e PS-së ashtu edhe në kabinetin qeveritar.
Në anën tjetër, në kampin opozitar, procesi është përqëndruar në përzgjedhjen e emrave për kandidatët për deputet.
Burime nga PD shprehen se Lulzim Basha mund të drejtojë fushatën e PD në Elbasan, duke u rikthyer në këtë qark pas plot 12 vjetësh. Në mandatin e dytë si deputet, në 2009-ën, Basha drejtoi fushatën e Elbasanit, ndërsa dy vite më pas dorëzoi mandatin e deputetit për të garuar si kryebashkiak i Tiranës.
Socialistët në Elbasan do të ketë sërisht Taulant Ballën, ndërsa LSI mund të rikthejë Edmond Haxhinaston.
Në Durrës duket se fushata do të drejtohet nga Gazmend Bardhi ose Oerd Bylykbashi. Ky i fundit mund të marrë drejtimin e fushatës vetëm nëse Bardhi zhvendoset drejt Fierit, atje ku deri më tani është Enkelejd Alibeaj.
Po në Fier duket se do të kandidojë edhe Monika Kryemadhi, e cila më parë ishte deputete në Elbasan. Kryemadhi do të zëvendësojë Petrit Vasilin, i cili duket se do të zhvendoset ose në Vlorë ose në Tiranë.
Socialistët sërisht ia kanë besuar Fierin, Gramoz Ruçit, ndër të paktët emra që i kanë shpëtuar largimeve nga PS dhe që ende ka pozita të forta në këtë parti.
Ndërsa në Shkodër, qarkun më të madh në veri të vendit, socialistët kanë rikthyer Ilir Beqajn, përballë tij nga demokratët mund të jenë dy emra të njohur, por jo të angazhuar politikisht.
Senada Reçi ose Imelda Kraja, njëra pedagoge dhe tjetra inxhiniere, mund të jenë risitë e demokratëve në qarkun e Shkodrës.
Korça do të jetë një tjetër përballje, ku socialistët ia kanë besuar fushatën Niko Peleshit, ish-zv.Kryeministër dhe ish-ministër i Bujqësisë në qeveritë Rama, më pas i larguar dhe lënë në hije. Ndërsa demokratët ia besojnë Ervin Salianjit, edhe pse si alternativë është edhe Edmond Spaho, i shkëputuar prej kohësh nga ky qark, pasi ishte i angazhuar në Elbasan. Në anën tjetër LSI duket se ia ka besuar Endrit Brahimllarit, që prej muajsh është i angazhuar në këtë qark.
Në Tiranë, duket se demokratët do të vendosin më shumë figura politike. Albana Vokshi, Edi Paloka, Jorida Tabaku, por edhe ish-Kryeministri Sali Berisha, thuhet se do të jenë pjesë e listës së Tiranës.
Ndërsa në anën tjetër socialistët kanë menduar për Elisa Spiropalin, Ervin Bushatin, Pandeli Majkon e ndoshta edhe Fatmir Xhafaj, raportet e të cilit me Ramën mbeten të “ngrira”, por që është ofruar së tepërmi me atë që mund të quhet si klani Veliaj në PS.
Në Vlorë, PS fushatën ia ka besuar Damian Gjiknurit, ndërsa demokratët mund të rikthejnë Bujar Leskajn, dikur deputet në këtë qark, dhe më pas drejtues i KLSH-së.
Genc Pollo mund të drejtojë fushatën në Gjirokastër, ku socialistët ia kanë besuar Bled Çuçit, një nga të paktët ministra që Rama i besoi detyrën e drejtuesit të qarkut. /BN/
