Partia Demokratike prej javësh po zbaton një proces të përzgjedhjes së kandidatëve për deputet, duke përmbyllur dy faza: atë të propozimeve të emrave nga anëtarësia dhe kalimin në një filtër të tyre nga Komisioni i Vlerësimit të Kandidatëve.
Ky Komision pothuajse ka skarcuar mbi 70 % të emrave të propozuar, ndërsa kandidatët e mbetur ende në lojë do ti nënshtrohen një vlerësimi nga anëtarësia e PD në nivel dege, grup degësh apo qarku, në varësi të numrit të kandidatëve.
Kjo shënon edhe fazën më të rëndësishme të procesit, i cili më pas vijon me vlerësimet për kandidatët nga Kryesia e PD-së.
Por e çuditshme mbetet mënyra sesi do të votojnë anëtarët e PD-së, pasi ato do të shprehin votë kontestuese dhe jo votë mbështetëse. Pra, kandidati që merr më shumë vota, skualifikohet. Kjo bazuar në udhëzimin e kreut të PD-së, Lulzim Basha, pika 28, ku thuhet se kandidatët me më shumë vota kontestuese, skualifikohen, hiqen nga lista.
Sipas drejtuesve në PD, kjo formë është përcaktuar e tillë, pasi nuk lejon lobingjet e kandidatëve. Por praktikisht ai mbyll edhe një fushatë të brendshme, ku kadidatët të shfaqen në ato që mund të quhen konventat lokale dhe të kërkojnë mbështetjen e anëtarësisë.
Gjithsesi edhe sikur të merret e mirëqënë fakti se është zgjedhur ky formulim për të mos lejuar lobingjet, çdokush në garë, aq më tepër figura me peshë, do të shpërndajnë përmes aplikacioneve telefonike apo forma të tjera, emrat e rivalëve në garë, që duhet të votohen nga anëtarësia për t´u skualifikuar.
Me formulimin që i është bërë udhëzimit, kandidatët në një qark do të duhet ti kërkojnë anëtarësisë që votat ti japin për rivalët e tyre në garë, gjë që mund të përbëjë një rast unikal në të gjitha praktikat zgjedhore.
Pra, dikush që do të synojë të mbetet të garë, duhet ti mbushë mendjen anëtarësisë, jo për të marrë sa më shumë mbështetje, por për të siguruar sa më pak vota, dhe në një rast të tillë më mirë i bie të jesh një kandidat anonim, mundësisht emrin ta kesh në një vend sa më të padukshëm, të mos votohesh dhe të vijosh garën.
Praktikisht, asnjëri prej kandidatëve nuk do të jetë në gjendje të dalë para anëtarëve dhe të shpalosë cilësitë e tij, dhe më pas ti thotë për shkak të cilëve të mia të mira, ju votën jepeni për rivalin, në garën e brendshme të partisë. /BN/
