Ndëshkimi nga Arbitrazhi për Qeverinë shqiptare, e cila duhet ti paguajë 44 milionë euro kompanisë greke, se i ndërpreu punimet e autostradës Tiranë-Elbasan, është komentuar edhe nga ish-ministri i PS-së, Arben Malaj.
Ai thotë se deri më tani, në kurriz të shqiptarëve janë 300 milion euro borxh që qeveria i ka marrë nga gjykatat ndërkombëtare. Nga ana tjetër, Malaj nënvizon se “besnikëria” e kryeministrit Edi Rama ndaj Taulant Ballës, po e vret politikisht edhe ligjërisht.
“Taulant Balla kapardiset se do të jetë ministri ri i Brendshëm, çka do të përbente një skandal publik. Kjo është periudha më e keqe tragjiko-komiko që po kalojnë shqiptarët, edhe për faj të tyre”, shkruan Malaj.
Postimi i plotë
Një vendim gjykate ndërkombëtare që vërteton se qeveria Rama është e pa përgjegjeshme, arrogante dhe e babëzitur.
Ja nga buroka “besnikëria neveritëse” e Taulant Ballës ndaj Ramës, të cilin po e vret politikisht dhe duhet ta “vras” edhe ligjërisht; modeli i qeverisjes së tij ku sundon korrupsioni dhe kapja e shtetit.
Përse duhet shqiptarët të paguajnë këto vendime gjykate ndërkombëtare deri tani rreth 300 milion euro, ndërsa Taulant Balla kapardiset se do të jetë ministri i ri i Rendit publik, çka do të përbente një skandal publik. Kjo është periudha më e keqe tragjiko-komiko që po kalojnë shqiptarët, edhe për faj të tyre.
