Vijon të rëndohet situata në pikën e kalimit Kufitar të Kakavijës, ndërsa rradha e automjeteve arrin në mbi 21 kilometra.
Referuar të dhënave më të fundit, vargu i automjeteve që presin të kalojnë në territorin grek e ka kaluar edhe distancën nga PKK e Kakavijës në fshatin Jorgucat.
Qytetarët në temperatura të larta janë të detyruar që të presin në radhë, ku disa prej tyre herë pas here shfaqin dhe probleme shëndetësore. Për shkak të numrit të lartë ta makinave në këtë aks, është bllokuar trafiku në të dy anët e rrugës Jorgucat-Kakavijë.
Qytetarët kanë kaluar një tjetër natë në automjetet e tyre, ndërsa duket se negociatat mes Ministrisë së Jashtme shqiptare dhe asaj greke për të zgjatur orarin e punës nga autoritetet doganore të Kakavijës duket se nuk ka dhënë asnjë rezultat.
Ministrja e Mbrojtjes, Olta Xhaçka, e ka cilësuar si situatë emergjente atë të krijuar në Kakavijë, duke ngritur edhe një shtab emergjence, i cili ka shpërndarë ujë dhe ushqime. Ndërkohë që ministri i Jashtëm në detyrë, Gent Cakaj, është mjaftuar me një njoftim në rrjetet sociale, ku bën të ditur se ka folur në telefon me homologun grek.
Kryeministri Edi Rama vijon pushimet me familjen në jug të vendit, ndërsa ministri i Diasporës, Pandeli Majko, nuk ka preferuar të reagojë.
Autoritetet greke në Kakavijë ndërprenë punën rreth orës 23:00 për ta rinisur sot në orën 06:00. Ambasada e Greqisë në Tiranë ka njoftuar se përmes Kakavijës nuk do të kalojnë më shumë se 750 persona, ndërkohë që çdo qytetar i nënshtrohet testit për Covid-19.
Greqia ka vendosur që çdo qytetar që do të hyjë në territorin grek pas datës 17 gusht, do të jetë i detyruar të karantinohet 1 javë.
