Vrasja në Vaun e Dejës / Detaje nga ekzekutimi me plumb në kokë

Një vrasje ka tronditur qytetin e Shkodrës orët e para të mëngjesit të djeshëm, ku një djalë i ri është gjetur i vrarë me armë zjarri. Gjin Boriçi, i njohur edhe si Gjin Frroku apo Gjin Ndoj, është ekzekutuar me plumb në kokë. Ngjarja ndodhi në orët e mëngjesit të 9 korrikut në segmentin nacional Shkodër-Tiranë, një aks që të çon në fshatin Shkjezë të Bashkisë Vau i Dejës.

Ka qenë ora 05:55 e mëngjesit, kur në Policinë e Shkodrës ka mbërritur një telefonatë se një person i gjakosur ndodhej i shtrirë në tokë. Menjëherë efektivët kanë shkuar në vendngjarje, ndërsa ka rezultuar se shtetasi Gjin Boriçi, 27 vjeç, është vrarë me plumb në kokë.

Pak metra nga viktima ndodhej makina e tij tip “BMW”, ndërsa 27-vjeçari ishte i shtrirë në tokë dhe i gjakosur nga plumbat që ka marrë në kokë. Grupi hetimor ka nisur menjëherë punën për zbardhjen e plotë të kësaj vrasjeje të ndodhur në Shkodër, raporton Panorama.

Burime pranë Policisë së Shkodrës kanë dyshime se 27-vjeçari është qëlluar më herët se në orën 05:55, rreth orës 5:00 ose dhe më herët. Në atë orar nuk gjendej askush në rrugë, ndërsa zona ku ndodhi vrasja nuk ka as kamera sigurie. Menjëherë pas gjetjes së trupit të pajetë, rreth 10 kilometra më tutje Policia ka marrë informacion edhe për një mjet të djegur.

Mjeti i dyshuar i autorëve të krimit u gjet i djegur plotësisht në një zonë të braktisur ku nuk ka lëvizje dhe është kufiri që ndan Lezhën me zonën e Vaut të Dejës. Autorët kanë kryer vrasjen në autostradë në një zonë të pasurvejuar nga kamerat, ndërsa më pas kanë djegur makinën në kufirin mes Lezhës dhe Vaut të Dejës, duke u munduar që të zhdukin të gjitha gjurmët e mundshme.

LEXO EDHE  I shpallur në kërkim 9 herë, arrestohet Petrit Lazeri

Autorët kanë pasur disa mundësi për t’u larguar, por ajo që dyshohet është se një mjet tjetër i ka pritur në vendin ku është djegur makina me të cilën kanë kryer krimin dhe më pas kanë vijuar rrugën drejt Lezhës, edhe pse kjo mbetet për t’u konfirmuar.

Ndërkohë, pas veprimeve hetimore rezulton se makina që u gjet e djegur është tip “Benz” dhe kishte targën AA 346 LC, targë kjo që është denoncuar si e vjedhur më 20 qershor të këtij viti në Ishëm, në pronësi të një vajze me inicialet A. K., e cila ka në pronësi mjetin tip “Fiat Punto”.

Policia në vendngjarje ka gjetur katër gëzhoja, të cilat i ka sekuestruar në cilësinë e provave materiale, ndërsa nuk disponon për momentin asnjë provë tjetër. Është sekuestruar edhe mjeti i djegur me shpresën për të gjetur ndonjë gjurmë të autorëve, edhe pse duket e pamundur pasi makina është shkrumbuar plotësisht.

Policia dyshon se autorët i kanë zënë pritë viktimës duke e ulur nga makina e tij dhe më pas duke e vrarë me plumb në kokë, për ta lënë më pas të vdekur në vend.

Deri më tani kjo vrasje është enigmë, ndërsa ajo që dihet është se 27-vjeçari Gjin Boriçi ose Gjin Ndoj apo Gjin Frroku siç njihet, është vrarë përmes një stili mafioz, duke mos lënë gjurmë. Pas ngjarjes së ndodhur, Policia ka nisur që të mbledhë informacion për të ngritur edhe pistat e mundshme të kësaj vrasjeje ose ndonjë alibi që mund të çojë tek autorët dyshuar, që ekzekutuan me plumb në kokë shtetasin Gjin Boriçi. /Panorama/