Shqipëria dhe Kosova numërojnë raste të shtuara të të infektuarve nga Covid-19, por edhe fatalitetet.
Pyetja që shtrohet në një situatë të tillë është nëse duhet të ketë kufizime në fluksin e ardhjes së shqiptarëve të Kosovës në Shqipëri?
Për mjekun Pëllumb Pipero, kufizimet nuk janë të nevojshme për sa kohë, njerëzit ndërgjegjësohen dhe zbatojnë rregullat e thjeshta të vendosjes së maskës, distancimit dhe higjienës.
“E gjithë bota është në një varkë të madhe. Të gjithë na ka në dorë maska kudo që jemi. Të gjithë kanë të njëjtat rregulla. Nëse i respektojmë këto masa nuk duhet të kemi frikë që bashkëkombasit tanë të vijnë këtu. Por duhet t’i këshillojmë që nëse kanë shenja të mos nisen. Të tjerët mos i kufizojmë pasi përfitojnë shumë nga deti dhe dielli”, shprehet Pipero.
Janë me mijëra shqiptarë të Kosovës që po kalojnë pushimet në bregdetin shqiptar, ndërkohë që vendet fqinje, Greqia apo Italia, nuk lejojnë udhqtimet e shtetasve shqiptarë, bazuar në një vendim të BE, për shkak të rasteve të shtuara nga Covid-19. Ndërkohë, Mali i Zi kërkon që shtetasit shqiptarë t´i nënshtrohen testimeve jo më larg se 72 orë nga dita e udhëtimit drejt këtij vendi.
