Dalin për të mbledhur rrjetat në Himarë, humb gruaja/ Shpëtohen 3 persona

Një grua dyshohet se është mbytur, ndërsa tre persona të tjerë u shpëtuan nga roja bregdetare.

Katër personat ndodheshin në bordin e një mjeti lundrues dhe nga raportimet po shkonin të mblidhnin rrjetat, kur u përballën me dallgë të forta dhe stuhinë.

Ngjarja ka ndodhur në afërsi të Himarës.

Nga të dhënat mësohet se Robert Rama 50 vjeç, bashkëshortja e tij dhe djali i tyre 25 vjeç, shkuan me një mjet të vogël lundrues të mblidhnin rrjetat, duke mos i dhënë rëndësi motit të keq. Ata u bllokuan tek “Shpella e Pëllumbave”.

Njoftimi

Policia Kufitare dhe roja bregdetare shpëtojnë tre shtetas që rrezikuan të mbyteshin në det, të cilët kishin dalë për peshkim me një mjet të vogël lundrues, i cili u fundos.

Vijon kërkimi intensiv në det, për gjetjen edhe të një shtetaseje që ishte në bordin e këtij mjeti lundrues, e cila dyshohet se është mbytur.

LEXO EDHE  ‘Të hudh në erë’/ I riu kërcënon policin që i vuri gjobë

Shërbimet e Policisë kufitare Dhërmi kanë marrë një telefonatë se një mjet lundrues ka dalë në det për peshkim dhe si pasojë e dallgëve të mëdha dhe motit të keq personat që ishin në bord rrezikonin të mbyteshin në Gjipe.

Shërbimet e Policisë Kufitare kanë dalë me mjetin lundrues menjëherë në drejtim të adresës së dhënë dhe kanë njoftuar edhe rojën bregdetare për ndihmë.

Si rezultat i operacionit të përbashkët të Policisë Kufitare dhe rojës bregdetare dhe ndihmës nga një mjet lundrues turistik i rastit, u bë e mundur të shpëtohen shtetasit R. R., F. R. dhe A. R., ndërsa shtetasja M. R. nuk është gjetur ende. Vijojnë kërkimet intensive me mjetet lundruese të Policisë Kufitare dhe të rojës bregdetare.

Personat e shpëtuar u dërguan në Jalë, ku i priste ambulanca e qendrës shëndetësore Himarë e njoftuar nga Policia Kufitare, dhe ndodhen në spital, jashtë rrezikut për jetën.