Vllaznia mesazh FSHF-së: Ndeshja ndaj Besëlidhjes të luhet me tifozë

Ditën e diel, në orën 19.00, në stadiumin “Loro Boriçi”, Vllaznia luan nesër në orën 19:00 kundër Besëlidhjes një ndeshje kjo që do të përcaktojë ekipin që do të luajë në Superiore sezonin e ardhshëm.

Dhe për këtë arsye klubi shkodran i është drejtuar Federatës Shqiptare të Futbollit, me një letër publike, ku i kërkon që kjo ndeshje të luhet në praninë e tifozëve, por vetëm pas portave.

 “KF Vllaznia është njohur përmes mediave por edhe përmes faqes tuaj zyrtare, me një kërkesë që Federata Shqiptare e Futbollit i ka bërë instancave shtetërore për ta luajtur me tifozë ndeshjen finale të Kupës së Shqipërisë, duke marrë edhe shembullin e Francës, ku finalja e Kupës u zhvillua me tifozë në tribunat pas porte.

Në këtë kontekst, do të dëshironim që në kërkesën tuaj ndaj instancave shtetërore të përfshini edhe ndeshjen Vllaznia- Besëlidhja. Vërtetë finalja e Kupës së Shqipërisë është finale, por edhe sfida jonë është një “finale”, dhe për më tepër një ndeshje që pritet me shumë interes nga tifozëritë e të dy ekipeve.

Për këtë arsye, kërkojmë nga ana Juaj që përpos dëshirës për të patur tifozë në ndeshjen finale të Kupës, ato të lejohen konform rregullave dhe distancimit edhe në ndeshjen Vllaznia- Besëlidhja.

16 mijë vendet që ka stadiumin “Loro Boriçi” janë një mundësi shumë e mirë që në stadium të ketë një numër të kufizuar tifozësh dhe duke respektuar rregullat e distancimit. Mbesim me shpresën e plotësimit të kësaj kërkese!”, shkruan klubi shkodran

LEXO EDHE  Klubet e Superiores i vendosin kushte qeverisë, kërcënojnë me bojkotim të sezonit të ri

Kujtojmë që më herët FSHF i drejtojë një letër instancave shtetërore ku i kërkonte që finalja e Kupës së Shqipërisë midis Tiranës dhe Teutës të luhej në praninë e tifozëve.