Nga Boldnews.al
Seanca gjyqësore ndaj “komisionerëve” të dosjes 339 zbuloi një tjetër gafë të prokurorisë speciale SPAK në atë që mund të quhet si “hetimi i manipulimit të zgjedhjeve në vitin 2017” në qytetin e Durrësit.
Gjykata Kundër Krimit të Organizuar dhe Korrupsionit konfirmoi masën e sigurisë për 20 komisionerët e qendrave të votimit, por shpalli menjëherë edhe moskompetencën lëndore, duke ia përcjellë aktet Prokurorisë së Durrësity
Ky vendim vendos në pikëpyetje veprimet e Prokurorisë Speciale-SPAK, por edhe të vetë gjykatës, e cila ka vendosur në mungesë 10 masa sigurimi “arrest me burg”, 7 “arrest në shtëpi” dhe 3 “detyrim paraqitje”, ndërkohë që për dy të tjerë u rrëzua masa paraprake, pasi kanë vdekur dy vjet më parë.
Gafa me kompetencën
Dosja “339” e krimit zgjedhor në Durrës po hetohet të paktën prej tre vitesh. Ajo u ndoq fillimisht nga Prokuroria për Krime të Rënda e më pas nga struktura e re, SPAK.
Përgjatë të gjithë kësaj kohe, Prokuroria Speciale ka pasur mundësinë që të konstatojë se komisionerët nuk janë në kompetencë hetimore të saj.
Me shumë mundësi, ish-Prokuroria për Krime të Rënda e më tej SPAK e kanë regjistruar dosjen “339” për veprat penale të kryera në kuadër të organizatës kriminale. Vetëm ky fakt mund të legjitimojë mbajtjen e dosjes në prokurorinë SPAK.
Por, vendimi i Gjykatës për shpalljen e moskompetencës, dëshmon se prokuroria nuk po e heton më rastin për “organizatë kriminale”.
Pra, prokuroria SPAK e ka pasur të qartë që hetimet për 20 komisionerët (plus 2 për personat e vdekur), nuk kanë qenë kompetencë e saj, por e Prokurorisë së Rrethit (Durrës, në rastin konkret).
Në këtë situatë, prokuroria SPAK duhet të kishte përcjellë aktet prej kohësh pranë Prokurorisë së Durrësit, e cila duhet të vijonte hetimet. Por, kjo gjë nuk ka ndodhur.
Atëherë, në këtë rast ngrihet pikëpyetja se cila është arsyeja e vërtetë e “mega-operacionit” të SPAK, efektet e të cilit po “çmontohen” me kalimin e orëve.
Zëra të ndryshëm publikë mendojnë se SPAK-u ka vepruar me urgjencë, i papërgatitur dhe, me shumë mundësi nën një presion politik për rezultate konkrete në krimet zgjedhore.
Megjithatë, edhe nëse pranohet se ka ekzistuar “presioni pozitiv” për rezultate, efekti i operacionit është ndër më të këqinjt e mundshëm.
Fillimisht, dy prej komisionerëve që duheshin arrestuar, kanë ndërruar jetë prej gati dy vitesh, duke dëshmuar se prokuroria ka kryer një hetim tejet sipërfaqësor.
Më tej, gjykata konstatoi se Prokuroria SPAK nuk kishte as kompetencë për të kryer këtë hetim, duke vënë nën dyshim arsyet e vërteta që rasti është mbajtur gjatë dhe pa veprime në një strukturë jo-kompetente.
Nga ana tjetër, nuk mbetet jashtë përgjegjësisë edhe Gjykata Kundër Krimit të Organizuar dhe Korrupsionit.
Gjykata, që në momentin që i kanë mbërritur kërkesat për masë sigurimi nga Prokuroria SPAK, ka pasur mundësi të konstatojë se nuk është kompetente për shqyrtimin e tyre.
Ka raste kur gjykatat, edhe pse nuk janë kompetente, mund të vendosin masën e sigurimit dhe më pas t’i kalojnë aktet në një gjykatë tjetër.
Në këto raste, gjykata duhet të bindet nga prokuroria për urgjencën që ka vendimi për masat e sigurimit.
Por, në rastin konkret, kur hetimi i dosjes “339” po zgjat prej gati 3 vitesh, elememti “urgjencë” është thuajse inekzistent.
Pra, gjykata ka pasur të gjitha mundësitë të bllokonte kërkesat e prokurorisë SPAK dhe t’i përcillte pranë gjykatës kompetente (Durrësit).
Por, edhe Gjykata Speciale, me shumë mundësi, ka preferuar të marrë pak “lavdi” nga efekti publik e mediatik i dosjes “339”, e cila në fakt u kthye në bumerang.
