Kuvendi mblidhet sot në seancë plenare, e para për këtë javë, ku priten të realizohen edhe dy të tjera, ndërsa sesioni parlamentar përfundon punimet më 30 korrik.
Në seancën e sotme në rend dite është vetëm një pikë, raporti përfundimtar i Komisionit Hetimor për Presidentin Ilir Meta.
“Raporti përfundimtar i komisionit hetimor “Për kontrollin e ligjshmërisë së veprimeve të kryera nga ana e Presidentit të Republikës së Shqipërisë, në kuadër të ushtrimit të kompetencave të tij lidhur me zhvillimin e zgjedhjeve për organet e qeverisjes vendore si dhe për të kontrolluar e ligjshmërinë e veprimeve dhe procedurës të ndjekur nga Presidenti i Republikës në kuadër të emërimit të gjyqtarëve kushtetues”. (Ligji nr. 8891, datë 2.5.2002 “Për organizimin dhe funksionimin e komisioneve hetimore të Kuvendit”, neni 25 Rregullore Kuvendi, votim i hapur, shumicë e thjeshtë votash për miratim”, thuhet në njoftimin e Kuvendit.
Pritet që Kuvendi të miratojë raportin, ndërsa socialistët u tërhoqën nga kërkesa për shkarkimin e Ilir Metës.
Kuvendi do të mblidhet edhe ditën e nesërme, si dhe të enjten, në dy seanca maratonë, ku pritet të përmbyllet Reforma Zgjedhore me dakordësinë mes palëve, si dhe të votohen ndryshimet kushtetuese dhe listat e hapura, propozime këto të opozitës parlamentare dhe të mbështetura nga kryeministri Edi Rama.
