Christian Schmidt, raporter për Shqipërinë në Grupin Parlamentar CDU/CSU, i ka tërhequr vëmendjen Kryeministrit Edi Rama për të mos bërë veprime të njëanshme me ndryshimin e Kushtetutës dhe heqjen e të drejtës për koalicione parazgjedhore, sipas vullnetit të partive.
Duke iu referuar lajmit më të hershëm të marrëveshjes mes partive politike, bazuar në dakordësinë e 5 Qershorit, Schmidt e konsideron atë një sukses të madh që forcon demokracinë në Shqipëri.
“Partia Socialiste po tenton ndryshime jashtë marrëveshjes: heqjen nga Kushtetuta të së drejtës për koalicione parazgjedhore. Për të favorizuar vetveten?”, thekson raporteri i CDU/CSU për Shqipërinë në Bundestagun gjerman.
“Me shqetësim të madh po shoh se Partia Socialiste po tenton ndryshime të tjera jashtë marrëveshjes: konkretisht po tenton heqjen nga Kushtetuta të së drejtës për koalicione parazgjedhore. Për të favorizuar vetveten?
Bëni kujdes! Ndryshime të tjera bëhen vetëm, nëse partitë e rëndësishme brenda dhe jashtë parlamentit bien dakord për to.
Jam i bindur se kryeministri Rama, i cili është edhe kryetar i radhës së OSBE-së, do ta mbrojë frymën e marrëveshjes së 5 qershorit mes të gjitha partive. Besimi reciprok është i domosdoshëm!”, shkruan raporteri i CDU/CSU për Shqipërinë në Bundestag.
Reagimi i Schmidt vjen pak ditë para se Kuvendi, në seancën e 30 korrikut, të votojë mbi ndrzshimet Kushtetuese të dakordësuara mes Edi Ramës dhe asaj që konsiderohet si “opozita” parlamentare. Qëndrimi i Schmidt është i njëjtë me atë që shprehur më parë nga politikanë të rëndësishëm gjermanë, por edhe nga Brukseli.
