Nga BoldNews.al
Zhurmat, që qarkullojnë prej ditësh në korridoret e drejtësisë se Gjykata e Posaçme e Apelit, ka nxjerrë vëzhguesin e ONM-së, Teo Jacobs, nga salla ku po shqyrtohej masa për pezullimin nga detyra të anëtarit të Kolegjit të Posaçëm të Apelimit, Luan Daci, marrin konfirmim zyrtar.
“Boldnews.al” ka mësuar se, në mbledhjen e fundit të Këshillit të Lartë të Prokurorisë, zhvilluar të premten e 17 Korrikut 2020, anëtari Bujar Sheshi ka informuar kolegët e tij për incidentin e ndodhur me vëzhguesin e Operacionit Ndërkombëtar të Monitorimit.
“Ai ka kërkuar të marrë pjesë dhe ka marrë pjesë në sallën e gjyqit, ku po zhvillohej seanca për masën e pezullimit për Luan Dacin. Gjykata e ka nxjerrë përjashtë, ka marrë vendim për ta nxjerrë përjashtë, pasi në seancat e masave nuk lejohen persona të tjerë”, ka deklaruar Sheshi.
Anëtari i KLP-së ka vijuar më tej, duke i sugjeruar Këshillit të Lartë të Prokurorisë të pyesë Operacionin Ndërkombëtar të Monitorimit nëse z. Jacobs ka ndonjë status të veçantë.
“A mund të sqarojmë, nëpërmjet ONM-së, nëse ka ndonjë staturë të vecantë ky Teo Jacobs. Ka ndonjë pozicion të vecantë, është caktuar nga misioni si përfaqësues? A mund t’i kërkojmë zyrtarisht informacion ONM-së për këtë individ”, u shpreh Sheshi.
Këto deklarata dhe informacione u shprehën gjatë mbledhjes së Këshillit të Lartë të Prokurorisë, ku po diskutohej mbi një qëndrim të mundshëm institucional lidhur me disa deklarata të papërshtatshme të vëzhguesit ndërkombëtar të ONM-së, Teo Jacobs, lidhur me punën e prokurorisë speciale-SPAK, si edhe prokurorëve të veçantë.
Vëzhguesi Jacobs, në seancën dëgjimore para Komisionit të Pavarur të Kualifikimit me gjyqtarin e Apelit të Shkodrës, Selim Kryeziu, vuri një dyshim një hetim të kryer nga SPAK mbi këtë subjekt rivlerësimi.
Jacobs hodhi dyshime se SPAK dhe prokurori i çështjes nuk kishin bërë aq sa duhet në hetimin që zgjati 6 muaj, ku Kryeziu dhe dy kolegë të tij ishin dyshuar për abuzim me detyrën.
Po ashtu, Jacobs vuri në dyshim edhe hetimet e kryera nga SPAK ndaj anëtarit të Kolegjit të Posaçëm të Apelimit, Luan Daci, tashmë i pandehur për “falsifikim dokumentash”.
Vëzhguesi i ONM-së deklaroi në atë seancë dëgjimore se “dy prokurorë të SPAK-ut nuk e meritojnë të jenë në detyrë”.
Ky qëndrim shkaktoi reagimin e menjëhershëm të drejtuesit të SPAK-ut, Arben Kraja. Ai, i cituar nga media, shprehur pakënaqësinë për qëndrimet e vëzhguesit Teo Jacobs.
Një ditë më pas, më 17 Korrik 2020, Këshilli i Lartë i Prokurorisë (KLP) vendosi të përfshijë në rendin e ditës diskutimet mbi një reagim të mundshëm institucional ndaj deklarimeve publike të z. Jacobs.
Krytari i KLP-së, Gent Ibrahimi, u duk i predispozuar për të mbajtur një qëndrim institucional.
Megjithatë, ai theksoi se informacioni që kishin deri në atë moment ishte mediatik dhe, për të reaguar si duhet, fillimisht do të duhet të kërkohej proces-verbali i seancës dëgjimore në Këshillin e Lartë të Prokurorisë.
Ky qëndrim u mbështet nga pjesa më e madhe e trupës së KLP-së. Ndërkohë që anëtarët Nurihan Seiti dhe Tartar Bazaj shprehën qëndrim alternativ.
Anëtarja Seiti deklaroi se, përsa kohë kishte reaguar mediatikisht drejtuesi i SPAK-ut, Arben Kraja, ajo nuk shihte arsye që të përfshihej edhe Këshilli i Lartë i Prokurorisë.
Por, kryetari Ibrahimi i kujtoi koleges Seiti se deklaratat e z. Jacobs kanë atakuar edhe vendimmarrjen e Këshillit të Lartë të Prokurorisë, i cili ka zgjedhur dhe emëruar të gjithë prokurorët e SPAK-ut.
Anëtari Tartar Bazaj mbështeti idenë që reagimi të bëhej vetëm nga kryetari i KLP-së, si pozicioni përfaqësues i institucionit.
Por edhe kjo ide u kundërshtuar nga kreu i KLP-së, Ibrahimi, i cili përmendi tre raste të tjera kur Këshilli ka reaguar si organ kolegjial dhe jo individual.
Në përfundim, Këshilli i Lartë i Prokurorisë vendosi t’i drejtohej Komisionit të Pavarur të Kualifikimit për të marrë proces-verbalin, përfshirë deklarimet e vëzhguesit të ONM-së, z. Teo Jacobs, në seancën dëgjimore të subjektit Selim Kryeziu.
Kjo çështje do të shqyrtohet sërish në mbledhjen e radhës së Këshillit të Lartë të Prokurorisë, e caktuar për këtë të Hënë, datë 27 Korrik 2020.
