Kryebashkiaku Erion Veliaj po ecën në gjurmët e Kryeministrit Edi Rama, i cili gjatë kohës që ishte ministër Kulture dhe më pas Kryetar i Bashkisë u mor me fasadat e Ministrive, për të cilat u vu nën akuzë edhe nga Komisioni Hetimor parlamentar i ngritur në vitin 2003.
Veliaj ka vendosur që të shkatërrojë fasadën e Ministrisë së Drejtësisë, e cila është e veshur me mermer, ndërsa punimet për fasadën e re do të kryen nga Fusha shpk.
Denoncimi është bërë nga Zëdhënësja e PD, Ina Zhupa.
“Manuali i shpërdorimit të parave të qytetarëve të Tiranës nga Erion Veliaj!
Rradha është e fasadës së ministrisë së drejtesisë, siç e keni parë një godinë e mirëmbajtur, e bukur, dhe simbolike për qytetin.
Fasada e ministrisë ishte tejet e rregullt, cilësore edhe e pa dëmtuar, bërë me pllaka të mëdhaja mermeri. Por Veliaj vendosi që Fusha shpk duhet të merrte paratë e qytetarëve të Tiranës për të prishur edhe ribërë fasadës e ministrisë së drejtësisë. Pllakat e padëmtuara të mermerit të shkatërroheshin dhe të vihen pllaka tualeti sipas projektit të Veliaj-Fushës”, tha Zhupa.
Sipas saj, zyrtarët e Ministrisë së Drejtësisë nuk kanë qënë dakort që të kryhej një ndërhyrje e tillë e panevojshme dhe penguese e kotë në punën e tyre të përditshme.
“Mirëpo “betejën” institucionale e fiton Veliaj, kryebetonieri, pinjolli i oligarkëve të ndërtimit duke shpërdoruar paratë e qytetarëve të Tiranës.
Këto para mund të ishin përdorur në dobi të banorëve apo për të ndihmuar biznesin e zonës që i ka paralizuar punët prej muajsh për një projekt milioner të Fusha shpk dhe Veliajt. Por jo, videot e propagandës duan një fasadë të re me paratë tona”, tha Zhupa, e cila ka postuar edhe disa foto.
