Nisma për ndryshimet kushtetuese që parashikojnë lista të hapura dhe ndalime të koalicioneve parazgjedhore, për avokatin Braho, tregon se Rama kërkon garanci nga Basha. Garanci, sipas avokatit, që të mos procedohet penalisht kur të mos jetë më kryeministër.
“Rama është i sigurt që do të humbë në zgjedhjet e ardhshme dhe kërkon garanci nga Basha. Këtë garanci kërkon ta bëjë nëpërmjet presionit. Garanci për të gjitha problemet që i ka sjellë Shqipërisë, për të gjitha këto afera korrupsione, për të gjitha këto shkelje që janë bërë për sa i përket lirisë së votës. Kërkon garanci të mos procedohet në të ardhmen kur të mos jete më kryeministër. Këto janë arsyet që Rama luan kartën e fundit që është propozimi i listave të hapura”, tha avokati në një intervistë televizive.
“Për mendimin tim është një blof sepse është krejtësisht alogjike që Rama, në fund të pushtetit, të kërkojë listat të hapura. Kë kandidatë do fusë për deputet me lista të hapura? Të gjithë janë të konsumuar. Është e kotë të pretendosh që ish-ministra dhe deputetë që kanë mbrojtur absurdin të marrin vota me listat e hapura”, vijoi ai.
Braho foli për një bashkëpunim mes mazhorancës dhe opozitës parlamentare. Ai tha se ky parlament e ka opozitën parlamentare si një patericë në çdo rast që i nevojiten vota.
“Dhe çuditërisht në këtë rast që duhet të miratohej me konsensus marrëveshja e Këshillit Politik (për Reformën Zgjedhore), opozita parlamentare bën ca kërkesa absurde që shkojnë në kundërshtim me interesat e saj. Sepse opozita parlamentare kërkon prag më të madh se 5 përqind apo ndarje të koalicioneve. Kjo është tërësisht kundër interesave të saj dhe në favor të mazhorancës. Kjo tregon se ka një marrëveshje mes mazhorancës dhe opozitës parlamentare. Dhe kjo marrëveshje, me forcën e kartonit, mund të miratosh ndryshimet kushtetuese”, u shpreh avokati.
