Komisioni i Ankesave dhe Sanksioneve (KAS) ka rrëzuar kërkesën e Partisë Socialiste, e cila kërkonte që të konsideroheshin si të vlefshme edhe votat ku shenja ishte bërë jashtë kuadratit, por që tregohej qartë vullneti i zgjedhësve.
Socialistët kërkonin që edhe nëse shenja e votimi x ose +, është vendosur jashtë kuadratit, por që e tregon qartë vullnetin e zgjedhësve të konsideroheshin si të vlefshme. Kjo, pasi sipas tyre, pas rinumërimit, shpallja e pavlefshme e këtyre votave po ndikon tek votat preferenciale të kandidatëve dhe renditja e tyre.
“Subjekti zgjedhor Partia Socialiste e Shqipërisë ka ardhur në dijeni të vendimmarrjes tuaj gjatë procesit të rivlerësimit të votave për zonën zgjedhore qarku Tiranë, nga ku rezulton se fletët e votimit në të cilat shenja dalluese që shpreh vullnetin e zgjedhësit nuk është vendosur brenda kutisë, janë vlerësuar si të pavlefshme nga ana juaj, në kundërshtim me praktikën zgjedhore ndër vite, si dhe kuadrin ligjor.
Referuar vendimit nr. 30, datë 25.04.2025, të Komisionit Rregullator për ‘Udhëzuesin punës për Komisionet e Zonave të Administrimit Zgjedhor dhe Grupet e Numërimit të Votave për zgjedhjet për Kuvendin e Republikës së Shqipërisë, në rastin kur shenja e zgjedhësit në fletën e votimit nuk ndodhet brenda kutisë që i korrespondon kandidatit përkatës të listës shumemërore, por shenja është bërë në mënyrë të tillë që e tregon qartë vullnetin e zgjedhësit, fleta e votimit konsiderohet e vlefshme.
Sa më sipër, duke qenë se vlerësimi i fletëve të votimit me shënimin si më lart si të pavlefshme, ndikon në numrin e votave të kandidatëve të listës preferenciale të subjektit zgjedhor Partia Socialiste, duke sjellë si pasojë ndryshimin e tyre në tabelën përmbledhëse, siç na ka rezultuar deri në këtë fazë, kërkojmë nga ju respektimin e kuadrit normativ rregullator dhe të praktikës të zbatuar deri më tani gjatë procesit të numërimit dhe vlerësimit të votave”, thuhej në kërkesën e PS.
Por, kërkesa e tyre është rrëzuar nga KAS dhe anëtari Ledio Braho në një prononcim për mediat ka shpjeguar edhe arsyet e marrjes së këtij vendimi.
“Edhe manuali i miratuar nga komisioni rregullator, se ne për vlerësimin e votës ne bazohemi te Kodi Zgjedhor dhe te udhëzimi i nxjerrë nga Komisioni Rregullator. Udhëzimi është i qartë që kur kryqi i vendosur në kolonën e një subjekti nuk është brenda kuadratit që është për kandidatët, atëherë vota konsiderohet e vlefshme vetëm për subjektin zgjedhor.
Ne këtë qëndrim kemi mbajtur, ndërsa nëse ajo nuk është në kutinë përkatëse të kandidatit ajo nuk mund të llogaritet si votë e kandidatit. Ne i kemi qëndruar vlerësimin objektiv, se nëse një kryq vendoset anësh, e bën të paqartë se për cilin kandidat është vendosur”,-tha Braha.
Ai shtoi se vendimi i sotëm, mund të ankimohet si nga PS edhe nga parti të tjera, në Kolegjin Zgjedhor.
