Kryeministri Edi Rama pohoi nga foltorja e Kuvendit se nuk i pëlqen marrëveshja e 5 qershorit, pasi nuk është plotësuar dhe respektuar kërkesa nr 1 e OSBE/ODIHR, depolitizimi i komisioneve zgjedhore.
Rama tha se gjithsesi kjo marrëveshje nuk do të preket dhe do të respektohet pikë për pikë.
Kryeministri duke iu referuar marrëveshjes dhe kërkesës për ndryshim të Kushtetutës, tha se ato janë të lidhura bashkë.
“Ju ftoj të reflektoni, as ju nuk do të merrni atë që kërkoni 100 %. Marrëveshja e 5 qershorit dhe kërkesa juaj për ndryshime Kushtetuese, që për hir të së vërtetës mbështetet nga shumica e shqiptarëve, janë të lidhura bashkë.
Ne nuk jemi autoritaristë sikundër na akuzojnë, pasi po të ishim, atëherë do i thonim atyre që janë jashtë Parlamentit, se s´kemi punë me Ju, se ju ikët. Por ne e pranojmë se PD është një realitet, por përtej partive, është një masë e madhe njerëzish, që janë partia më e madhe, populli, që kërkojnë këto ndryshime”, tha Rama.
Kreu i Qeverisë tha se marrëveshja e 5 qershorit është e nevojshme për të dhënë një mesazh shumë të qartë se që të gjithë janë pjesë e këtij procesi, ndaj dhe nuk do të griset.
Në këtë kuadër, Rama tha se do i qëndrojmë deri në fund hapjes së listave, por sa dhe si, kjo është një çështje që do të diskutohet.
“Ndryshimi Kushtetues do të sanksionohet se askush nuk duhet ti ketë listat e hapura më pak se 2/3 dhe aty do të garantojmë edhe përfaqësimin e grave apo vajzave”, tha Rama.
DENONCO