Kryetarja e Komisionit për Shëndetësi në Kosovë ka rezultuar pozitive me Covid-19. Kjo konfirmohet nga vetë Albena Reshitaj me anë të një postimi në rrjetet sociale.
Deputetja e AAK-së shkruan se nga fundjava kanë nisur që t’i shfaqen simptomat e Covid-19 dhe për këtë arsye i është nënshtruar testit.
Po ashtu, Reshitaj shprehet se deri në testin e radhës do të qëndrojë e izoluar në shtëpi.
Kujtojmë këtu se më herët, se ishte infektuar me koronavirus konfirmoi edhe deputeti i PDK-së, Abelard Tahiri.
Postimi:
Të nderuar qytetarë, miq e kolegë,
Që nga fillimi i Pandemisë jam përpjekur të zbatoj masat e rekomanduara nga institucionet shëndetësore dhe vazhdimisht kam bërë ftesë për zbatimin e tyre.
Pas seancës së ditës së Premte, konkretisht prej të Shtunës së këtij vikendi kanë filluar të më shfaqen disa simptoma që lidhen me infeksionin me Covid-19 dhe pastaj iu kam nënshtruar testit ku kam rezultuar pozitiv.
Deri në testimin tjetër pas një kohe të përcaktuar sipas protokollit unë do të qëndroj e izoluar në shtēpi.
Dua edhe një herë ti bëjë ftesë të gjitha institucioneve të vendit që të rrisin përkushtimin në respektimin e masave mbrojtëse, të ndalohen të gjitha ngjarjet dhe aktivitetet aty ku nuk ka kushte dhe ku nuk respektohen masat e rekomanduara nga IKSHPK.
Të rritet përkushtimi dhe disiplina sa nuk është bërë tepër vonë.
