Një rast pozitiv me COVID-19 është konfirmuar në Drejtorinë Arsimore Tiranë, bënë me dije punonjës pranë institucioni për “BoldNews.al”. Personi i infektuar me koronavirusin e ri mësohet se mban postin e specialistit në këtë institucion. Ndërkohë, tre punonjës së tjerë kanë simptoma të sëmundjes dhe janë vetëizoluar në banesat e tyre.
Disa punonjës të DAR Tirane kanë denoncuar pranë “Boldnews.al”, se pavarësisht situatës, askush nuk ka shkuar te ata për të kryer testin e COVID-19. Edhe pse kanë patur kontakte me personin e infektuar dhe tre punonjësit e tjerë që kanë shfaqur simptomat e virusit, e tashmë janë karantinuar.
Të njëjtat burime saktësojnë se bëhet fjalë për të paktën 25 punonjës që kanë pasur kontakte me personin që rezultoi pozitiv në testin e COVID dhe tre të tjerët, që dyshohet se janë të infektuar me koronavirus.
Rasti bëhet më i rëndë, teksa situata duket se nuk po trajtohet me seriozitet nga instancat, që zyrtarisht nuk kanë kryer asnjë testin te personat e dyshuar me COVID-19 dhe kontaktet e punonjësit të konfirmuar pozitiv.
Propagandë në vend të gjurmimit real
Ekspertë të shëndetësisë, brenda e jashtë vendit, kanë shprehur njëzëri rëndësinë e gjurmimit të kontakteve të personave të infektuar dhe izolimin e virusit, si një hap i rëndësishëm për të mundur sëmundjen.
Në çdo konferencë ditore, ku njoftohet bilanci ditor i COVID-19 në vend, zyrtare të Ministrisë së Shëndetësisë apo Institutit të Shëndetit Publik shprehen se, specialistët janë të angazhuar pa ndërprerje në gjurmimin dhe hetimin epidemiologjik. Madje, ministrja e Shëndetësisë Ogerta Manastirliu ka artikuluar se është bërë një “punë e madhe” në këtë drejtim. Por, realiteti duket krejt ndryshme, e nxjerr në pah propagandën qeveritare.
Në një institucion shtetëror, ku një punonjës ka rezultuar pozitiv me COVID-19, nuk është kryer asnjë tampon te kontaktet apo të dyshuarit si të infektuar me virusin, të cilët kanë shfaqur simptoma.
Ky nuk është i vetmi rast i kësaj natyre. Në media, janë denoncuar shpeshherë të tilla situata, ku nga autoritetet shëndetësore nuk kryhen tamponët te personat e dyshuar me COVID dhe kontakte të afërta me ata të konfirmuar pozitiv.