Gjekson Pusi, 33 vjeç, i arrestuar për atentatin ndaj Fatjon Harushës, akuzohet si i përfshire dhe në vrasjen e Hekuran Billës, ndodhur në Tiranë, më 11 Qershor.
Burime zyrtare nga policia bënë me dije se ndaj të riut, rëndonte dhe një masë sigurie arresti shtëpiak për veprën penale “Armëmbajtja pa leje”. Megjithatë, kjo duket se nuk e ka penguar të përfshihet në dy ngjarje të rënda kriminale.
Atentati në Shkodër
Burime zyrtare nga policia bënë me dije se 33-vjeçari u arrestua nga strukturat e Drejtorisë Vendore të Policisë Shkodër, pasi dyshohet se është autor i ngjarjes së ndodhur në fshatin Vukatanë, ku u qëllua me armë zjarri në drejtim të automjetit në pronësi të DPSHTRR, që drejtohej nga shtetasi Fatjon Harsuha, 30 vjeç, banues në Dobraç, Shkodër. Fatjon Harusha është kushëriri i deputetit të Partisë Socialiste Luan Harusha.
Vrasja e Billës
“Gjithashtu, gjatë paradites së sotme, falë veprimeve hetimore të kryera nga strukturat e DVP Tiranë, ka rezultuar se ky shtetas është i dyshuar si bashkëpunëtor në vrasjen e shtetasit Hekuran Billa”, shtuan të njëjtat burime.
Për policinë, Gjekson Pusi ka qenë drejtuesi i mjetit me të cilën lëvizi Viktor Marku (i dyshuar si ekzekutori i Billës) kur ndodhi atentati.
Më herët, për vrasjen janë arrestuar dhe lënë nën arrest me burg nga gjykata: Viktor Marku, nipi i tij Sebastian Mali dhe Adjola Lakra. Kjo e fundit, sipas hetimeve, ishte infiltruar nga Viktor Marku dhe Sebastian Mali për ta nxjerrë biznesmenin në pritë. Mali dyshohet se ishte personi që ruante lëvizjet e Billës, ndërsa Viktor Marku – ekzekutori. Vrasja e Hekuran Billës, sipas grupit hetimor, ka lidhje me një vrasje të ndodhur në vitin 2006 në Angli. Asokohe, Hekuran Billa vrau me armë zjarri Pal Markun, vëllanë e Viktor Markut.
Arrestimi për armëmbajtje pa leje
Në Tetor të vitit të kaluar, 33-vjeçari u arrestua për armëmbajtje pa leje nga policia. Ngjarje për të cilën ndaj tij u vendos masa e arrestit me burg.
Mediat raportuan asokohe se Pusi ishte pikasur nga kalimtarë të rastit se në brez kishte armë zjarri. Pas kësaj, ata e kanë denoncuar rastin në Polici, duke bërë që brenda pak minutave efektivët e Komisariatit të Shkodrës ta prangosin në kushtet e flagrancës. Arrestimi i tij u krye në lagjen “Vasil Shanto” dhe në momentin që konstatoi se po i afroheshin punonjësit e Policisë, tentoi të largohej me vrap.
Grabitja në zyrat e LSI
Pusi është dënuar me 8 vite burgim nga Gjykata e Shkodrës për veprën penale ‘Vjedhja me armë’ kryer në bashkëpunim. Ngjarja për të cilën është dënuar ka ndodhur në vitin 2013, përudhë fushate zgjedhore. Asokohe në një nga zyrat e LSI-së në Shkodër, u grabit një zyrtar i Lëvizjes Socialiste për Integrim. 33-vjeçari ishte pjesë e grupit që u shpall fajtor për ngjarjen dhe u dënua nga gjykata me burg, bashkë me të vëllain.
/BoldNews.al/
