Gjenson Pusi, një nga emrat e njohur të botës së errët të krimit në Shkodër është vënë në pranga nga oficerët e njësisë speciale “Serious Organised Crime Unit” në zonën e Essex të Britanisë së Madhe.
34-vjeçari, i njohur për problemet me drejtësinë në Shqipëri është arrestuar dhe dënuar nga një gjykatë angleze me me 6 vite burg.
Shkodranit të njohur iu gjet nën krevat një armë pistoletë me fishek gati për qitje, ndërsa brenda xhepit të xhaketës iu gjetën edhe 6.000 stërlina, një sasi kokaine, një peshore dhe disa telefona.
Policia angleze arriti të zbulonte që një ambient tjetër i shtëpisë përdorej për kultivim kanabisi, ndërsa një thes plastik i zi që përdoret për hedhjen e plehrave iu gjet plot me kanabis.
Në armën e sekuestruar tip “Glock” u gjet ADN-ja e Gjenson Pusit por ai nuk dha asnjë koment gjatë marrjes në pyetje në polici. Vetë në gjykatë ai pranoi akuzat e ngritura nga prokuroria.
Gjenson Pusi është një emër i njohur për policinë e Shkodrës, pasi u arrestua si bashkëpunëtor në vrasjen e Hekuran Billës, por mohoi të ketë lidhje në këtë ngjarje.
Policia ngriti dyshimin se ai ka qenë shoferi i mjetit “Mercedes Benz” i përdorur në këtë atentat.
I marrë në pyetje nga hetues të Krimeve të Rënda në Policinë e Tiranës, 33 vjeçari ka pohuar se mbrëmjen e 30 qershorit kur ndodhi krimi, ka qenë në banesën e tij në Shkodër.
Ai përdori si argument faktin se ndodhej me masë sigurie “Arrest në shtëpi” dhënë nga gjykata e këtij rrethi për armëmbajtje pa leje.
Gjekson Pusi është arrestuar edhe në muajin tetor të vitit 2019, ndërsa u vu në pranga pasi u pikas teksa lëvizte me një armë zjarri të llojit “Zastava” me dy krehra me fishekë në Shkodër.
Gjekson Pusi ishte pikasur nga kalimtarë të rastit se në brez kishte armë zjarri, dhe të trembur këta të fundit lajmëruan policinë. Brenda pak minutash, 33-vjeçari ra në prangat e policisë në kushtet e flagrancës, teksa ecte në lagjen “Vasil Shanto” në Shkodër.
Më herët, Gjekson Pusi ka qenë i dënuar me tetë vite burg për “Vjedhje me armë”.
