Mjeku i njohur shqiptar, Kita Sallabanda, i cili ushtron proofesionin në Spanjë, shprehet se ajo që po ndodh në Shqipëri me shtimin e rasteve me Covid-19 është e pafalshme.
Në një lidhje me abcnews, Sallabanda tha se Shqipëria sot ka po aq raste sa edhe Spanja, e cila ka një popullsi 13 herë më të madhe se Shqipëria.
“Është e pafalshme që infeksioni ka hyrë në spitale. Të shkojë pacienti në spital për t´u trajtuar për një sëmundje dhe të infektohet me koronavirus është e paimagjinueshme. Kjo duhej të ishte shmangur. Në Spanjë situata të tilla nuk mund të ndodhin pasi ka protokolle strikte, kjo duhet të ndodhë edhe në Shqipëri”, tha Sallabanda. Sipas tij, në kushtet aktuale, duhet të bëhet e detyrueshme mbajtja e maskave, nëse distancat sociale nuk zbatohen.
“Në Spanjë edhe kur shkohet në plazh ka dy rrugë, një që të çon dhe një për tu larguar, duke ruajtur kështu distancimin mes njerëzve.
Duhet të shtohen testimet në popullatë, duhet të shtohen testet serologjike, për të parë se sa përqind e popullatës ka krijuar antitrupa.
Në Shqipëri po ndodh diçka që nuk po ndodh në asnjë vend tjetër. Nuk diskutohet që transmetueshmëria e virusit ka rënë, ka rënë kudo, edhe në Spanjë, edhe në Shqpëri. Nuk mund të flitet për një agresivitet të virusit në Shqipëri.
Mendoj se atje nuk respektohen masat dhe Qeveria duhet të marrë masa”, tha Sallabanda.
Ai apeloi që në institucione, universitete apo kudo ku është e mundur të aplikohet puna nga shtëpia, si një masë për të parandaluar grumbullimet në zyra të personelit apo punonjësve.
“Duhen kontrolle, veçanërisht në zonat me risk”, tha ai.
